Trump ‘i shpëton’ dënimit për 10 vota – Senati amerikan nuk siguron shumicën e mjaftueshme për të dënuar ish-presidentin
Senati i SHBA nuk ka arritur shumicën e dy të tretave të nevojshme për të dënuar ish Presidentin Donald Trump me akuzën e nxitjes së kryengritjes së Kapitolit në 6 Janar.
Një shumicë e senatorëve – 57 me 43, përfshirë shtatë Republikanë – votuan për të dënuar Z. Trump, 10 vota më pak se 67 të kërkuara për dënim.
Pas shfajësimit të tij, Trump lëshoi një deklaratë duke denoncuar gjyqin si “gjuetia më e madhe e shtrigave në histori”.
Nëse ai do të ishte dënuar, Senati mund të kishte votuar për ta ndaluar atë të kandidojë sërish për president në të ardhmen.
Pas votimit, republikani kryesor në Kongres, Senatori Mitch McConnell tha se Trump kishte qenë “përgjegjës” për sulmin ndaj Kapitolit dhe e quajti atë një “shkelje të turpshme të detyrës”. Por ai votoi kundër dënimit, duke thënë se ishte antikushtetuese tani që Z. Trump nuk ishte më president.
Sidoqoftë, McConnell paralajmëroi se Trump ende mund të mbahej përgjegjës në gjykatë.
Presidenti Joe Biden tha: “Ndërsa votimi përfundimtar nuk çoi në një dënim, përmbajtja e akuzës nuk mund të diskutohet.
Shtatë republikanët që votuan pro dënimit të Trump ishin Lisa Murkowski, Susan Collins, Ben Sasse, Bill Cassidy, Richard Burr, Mitt Romney dhe Pat Toomey.
D.B – SCAN
Burimi: BBC
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.