Trump marrëveshje me demokratët – Bie dakord për të rritur limitin e borxhit në afatshkurtër

Presidenti Donald Trump arriti një marrëveshje surprizuese me demokratët në Kongres, për të rritur limitin e borxhit në Shtetet e Bashkuara dhe për të ofruar financim qeveritar deri më datën 15 Dhjetor.

Trump u takua në Shtëpinë e Bardhë me liderët në Kongres nga të dy partitë dhe hodhi poshtë sugjerimet e republikanëve dhe të Sekretarit të Thesarit Steven Mnuchin, i cili kërkonte një rritje më të gjatë të tavanit të borxhit se sa një periudhë 3-mujore që propozonin demokratët.

“Mund të arrinim një marrëveshje 1-vjeçare”, tha Sekretari i Thesarit. Mnuchin tha se Trump zgjodhi marrëveshjen afatshkurtër për të ruajtur opsionet e tij për një rritje të mundshme të shpenzimeve ushtarake këtë vit.

Ai shtoi se Trump është shumë i fokusuar në shpenzimet ushtarake, “duke marrë parasysh situatën në Korenë e Veriut”.

Nëse paketa kalon në Kongresin e udhëhequr nga republikanët, kjo do të shmangë një dështim të mundshëm të pagesave në borxhin qeveritar në SHBA, do të mbajë qeverinë të financuar në hyrje të vitit fiskal që nis më 1 Tetor dhe do të ofrojë ndihma për viktimat e uraganit “Harvey”.

Zyrtarët thonë se pavarësisht marrëveshjes, Departamenti i Thesarit nuk do të ndalet për të përdorur fuqitë në zgjatjen e mëtejshme të afatit, në varësi të fluksit të të ardhurave.

Pas lajmërimit, titujt e kapitalit në Shtetet e Bashkuara u rritën ndjeshëm, me të tre indekset kryesorë që rezultuan në performancë të fortë. Yieldet e titujve 10-vjeçarë të thesarit u rritën, duke u rimëkëmbur nga niveli më i ulët në 10 muaj prej 2.054%.

Departamenti i Thesarit kishte paralajmëruar se tavani i borxhit duhet rritur në javët që vijnë, pasi Qeveria nuk do të mund të merrte hua apo të paguante faturat.

Kjo, sipas Fitch Ratings, do të dëmtonte vlerësimin e kreditit të Shteteve të Bashkuara, gjë që do të trondiste tregjet financiarë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.