Trump: Marrëveshje me Kinën – “Fola me Xi Jinping, të gjithë e duam një ujdi për tregtinë”

Presidenti amerikan, Donald Trump deklaroi se me shumë gjasa do të bëjë një marrëveshje me Kinën për tregtinë, duke shtuar se është bërë shumë progres kohët e fundit mes dy vendeve për të zgjidhur mosmarrëveshjet tregtare. Por, ndër të tjera, ai shtoi se, mbetet ende e hapur mundësia për të vendosur tarifa të tjera tregtare ndaj Pekinit. “Kina do shumë të bëjmë një marrëveshje”-deklaroi Donald Trump.

“Ne kemi patur bisedime të frytshme me Kinën, dhe po shkojmë drejt diçkaje”-shtoi numri një i Shtëpisë së Bardhë.  “Unë fola me presidentin Xi Jinping dhe ata e duan shumë këtë marrëveshje, që do të jetë e drejtë për të gjithë, dhe një marrëveshje e mirë për Shtetet e Bashkuara të Amerikës”-mbylli Trump fjalën e tij.

Dy presidentët do ta diskutojnë këtë çështje mes njëri tjetrit në fund të muajit Nëntor gjatë samitit të G20 në Buenos Aires. Administrata amerikane ka vendosur tarifa shtesë për 250 miliardë dollarë importe nga Kina. Kjo luftë e hapur tregtare mes dy vendeve ka përcjellë valë shqetësimi në thuajse çdo cep të globit, duke ndikuar edhe në performancën ekonomike.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.