Trump në përfundim të fushatës: Covid – 19, mjekët fitojnë më shumë nga pacientët e sëmurë
Presidenti Donald Trump ka zgjedhur të kalojë ditët e fundit të fushatës zgjedhore duke kritikuar zyrtarët publikë dhe profesionistët e mjekësisë që po përpiqen të luftojnë pandeminë.
Gjatë fushatës në Midwest të Premten, Trump dha një mesazh përmbyllës që premtonte ringjallje ekonomike dhe një vaksinë për të luftuar COVID – 19. Por, kjo dozë e “optimizmit” u dha pas shumë ankesash drejtuar rivalit Joe Biden dhe shumë të tjerëve.
Trump tha “gabimisht” se mjekët fitojnë më shumë para kur pacientët e tyre vdesin nga sëmundja, duke u mbështetur në kritikat e tij të së kaluarës ndaj ekspertëve mjekësorë si Dr. Anthony Fauci.
Ndër të tjera, Trump u tha gazetarëve se nuk ishte i shqetësuar që mbështetësit që ndjekin organizimet e Tump mund të ishin të infektuar, edhe pse ai, familja e tij dhe shumë punonjës të Shtëpisë së Bardhë kanë luftuar me sëmundjen javët e fundit.
Trump kritikoi zyrtarët demokratë në Minesota për zbatimin e rregullave të distancimit social që kufizuan tubimet në 250 persona. “Është një gjë e vogël, por një gjë e tmerrshme”, u shpreh Trump.
Nga ana tjetër, presidenti amerikan paralajmëroi votuesit se Biden do të ndalonte amerikanët të festonin Ditën e Falënderimeve dhe Krishtlindjet, apo festa të tjera, nëse do të fitonte zgjedhjet.
Burimi origjinal: Reuters
Përshtati në shqip: SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.