Trump nënshkruan tarifat – Do të përjashtojë Kanadanë dhe Meksikën, pranon negociata
Presidenti i Shteteve të Bashkuara Donald Trump miratoi tarifat prej 25% të importit të çelikut dhe 10% për aluminin, por përjashtoi Kanadanë e Meksikën dhe ofroi mundësinë e përjashtimit të vendeve të tjera, duke u tërhequr nga qëndrimi i mëparshëm.
Trump, duke e përshkruar hyrjen e lirshme të çelikut dhe aluminit në tregun amerikan si një “sulm ndaj vendit”, tha se alternativa më e mirë do të ishte që kompanitë të zhvendosin fabrikat e tyre në SHBA.
Ai përsëriti se prodhimi i brendshëm i metaleve është i rëndësishëm për sigurinë kombëtare. Planet për tarifat, që do të aplikohen pas 15 ditësh, janë përballur me kundërshti nga liderët e bizneseve dhe vetë republikanët, ku sipas tyre, mund të shkaktojnë “kundërmasa” nga vendet e tjera duke sjellë më shumë dëme për ekonominë.
Zyrtarët në Kanada, që është furnizuesi më i madh i çelikut dhe aluminit për Shtetet e Bashkuara, e mirëpritën lajmin që nuk do të jenë subjekt i tarifave, por premtuan se nuk do të tërhiqen deri sa kërcënimi të jetë larguar plotësisht.
Trump ofroi lehtësime për vendet që kanë sjellje të rregullt tregtare me SHBA, që do të thotë se Kanadaja dhe Meksika, duhet të japin dorëlëshime në rinegocimin e Marrëveshjes së Tregtisë së Lirë me Amerikën e Veriut (NAFTA).
Ministria e Tregtisë në Kinë deklaroi se i kundërshton tarifat dhe se këto do të ndikojnë në rendin e tregtisë ndërkombëtare. Komisionerja e Tregtisë në Europë, Cecilia Malmstrom, tha se Bashkimi Europian është aleat me Shtetet e Bashkuara dhe se pritet që të përjashtohet nga këto masa.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.