Trump paralajmëron Kinën – Do tarifojë të gjithë importet nëse nuk ka marrëveshje
Presidenti i Shteteve të Bashkuara, Donald Trump, tha se pret një marrëveshje të mirë me Kinën mbi tregtinë, por paralajmëroi se mund të vendosë tarifa të tjera prej miliarda dollarë, nëse nuk arrihet një dakordësi.
Trump tha në një intervistë për FOX News se ai mund të bëjë një marrëveshje, por shtoi se Kina nuk është ende gati.
Sipas raportimeve, Washingtoni po përgatitet që të lajmërojë tarifa në të gjithë pjesën e mbetur të importeve nga Kina në fillim të muajit Dhjetor, nëse dështojnë bisedimet e muajit të ardhshëm mes Trump dhe presidentit kinez, Xi Jinping.
Trump dhe Xi Jinping pritet të marrin pjesë në samitin e G20-ës në Buenos Aires muajin e ardhshëm, ku do të bisedojnë për tregtinë.
“Kina ka dëmtuar rëndë ekonomikisht vendin tonë. Ne kemi për ta fituar këtë luftë. Unë kërkoj të bëjë një marrëveshje që tani, por ata nuk janë ende gati. Ne kemi vendosur tarifa në 250 miliardë dollarë dhe kemi kapacitet për 267 miliardë dollarë të tjera, nëse nuk arrihet marrëveshje. Megjithatë, mendoj se do të arrijmë një marrëveshje të mirë me Kinën”, tha Trump.
Shtetet e Bashkuara kanë vendosur tarifa në 250 miliardë dollarë mallra kineze dhe Kina është kundërpërgjigjur me barriera në 110 miliardë dollarë mallra amerikan.
Trump ka kërcënuar prej kohësh se do të tarifojë të gjithë pjesën e mbetur të importeve kineze në SHBA, nëse Pekini dështon të ndryshojë politikat tregtare, transferimin e detyrueshëm të teknologjisë dhe politikat e subvencioneve industriale.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.