Trump përballë “kundërmasave” të BE – Kërcënon prodhuesit europianë të makinave me taksa të importeve
Presidenti i Shteteve të Bashkuara ka vendosur përsëri nën presion lidhjet me partnerët tregtarë, duke kërcënuar prodhuesit europianë të makinave me taksa të importeve nëse Bashkimi Europian kundërpërgjigjet ndaj planit të tij për tarifa mbi çelikun dhe aluminin.
Komentet e Trump tregojnë se ai ka refuzuar t’i dorëzohet interesit të bizneseve në SHBA dhe parnterëve tregtarë, që janë alarmuar mbi perspektivën e një lufte tregtare.
“Nëse BE kërkon të rrisë tarifat dhe barrierat e kompanive amerikane që bëjnë biznes atje, ne do të aplikojmë një taksë për makinat e tyre që kalojnë lirshëm drejt Shteteve të Bashkuara.
Ata, nga ana tjetër, e kanë bërë të pamundur që makinat tona të shiten atje”, shkroi Trump në Twitter.
Shtetet e Bashkuara kanë caktuar një tarifë prej 2.5% për makinat që montohen në Europë dhe 25% për kamionët që janë prodhuar në Europë. Nga ana tjetër Bashkimi Europian ka caktuar një tarifë prej 10% për makinat e prodhuara në Amerikë.
Pas lajmërimit të Donald Trump mbi tarifat për çelikun dhe aluminin, Komisionerja për konkurrencën, Margrethe Vestager tha se BE do t;i përgjigjet për të mbrojtur industrinë europiane dhe sistemit tregtar botërorë.
Prodhuesit gjermanë të makinave si Volkswagen, Daimler dhe BMW, prodhojnë automjete në fabrika në Shtetet e Bashkuara.
BMW punëson më shumë se 9,000 staf në Karolinën e Jugut dhe është një nga punëdhënësit më të mëdhenj të shtetit.
Shitjet drejt Shteteve të Bashkuara zënë 15% të totalit në të gjithë botën për markat Mercedez dhe BMW, 12% për Audi dhe 5% për Volkswagen.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.