Trump “provokon” Kinën – Kërkon t`i shesë Tajvanit armë në vlerën e $1.42 mld
Shtetet e Bashkuara të Amerikës planifikojnë ti shesin Tajvanit armë në vlerën e 1.42 miliardë dollarëve. Diçka të tillë e bëri të ditur zëdhënësi i Shtëpisë së Bardhë, i cili shtoi se, administrata amerikane i ka kaluar Kongresit 7 propozime, mes të cilave edhe atë për shitjen e armëve ndaj Tajvanit.
Vendimi pritet të acarojë së tepërmi marrëdhëniet mes Kinës dhe shteteve të Bashkuara, për të dytën herë që prej ditës kur Donald Trump u zgjodh president.
Herën e parë, marrëdhëniet u acaruan nga telefonata mes Trump dhe presidentit tajvanez. Kina asokohe reagoi ashpër. Të njëjtën gjë ka bërë edhe kësaj radhe, duke dalë haptazi kundër kësaj marrëveshje.
Sipas Shtëpisë së Bardhë, kjo marrëveshje ka për qëllim që të rrisë aftësinë e Tajvanit për t`u vetëmbrojtur, por se kjo nuk do të thotë se Shtetet e Bashkuara do të ndryshojnë politikën e tyre ndaj Kinës, e quajtur ndryshe si “një Kinë”, dhe e promovuar nga Pekini zyrtar ndër dekada.
Kjo politikë detyron shtetet e tjera që të kenë të njëjtën politikë edhe me vendet dhe territoret e kontestuara nga Pekini, duke mos i ndarë ato e duke i dhënë llogari vetëm qeverisë kineze.
Kina nuk e ka braktisur asnjëherë idenë e përdorimit të forcës për të futur nën kontrollin e saj ishullin e vetë-qeverisur.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.