Turistët “rikthehen” në Europë, sektori rimëkëmbet gjatë 2017-ës

Turistët po rikthehen në Europë, ndërkohë që kjo po reflektohet kudo, sidomos në rritjen e prenotimeve në hotele, rritjen e blerjeve në zonat duty free apo edhe në trafikun ajror. Të gjitha këto përkthehen në projeksionet më të mira sa i përket fitimeve për kompanitë e udhëtimit.

Turizmi europian po ndihmohet kështu edhe nga rimëkëmbja e vendeve në zhvillim, kryesisht Kinës, Brazilit, dhe Rusisë. Paundi i dobët nga ana tjetër ka nxitur ndjeshëm turizmin në ishull.

Indeksi pan europian Stoxx 600 i kompanive që operojnë në sektorin e udhëtimit dhe atë të argëtimit, që përfshin hotelet, kompanitë ajrore, prodhuesit e birrës apo edhe kompanitë e basteve, është në rritje me 2% deri më tani gjatë vitit, pas një rënie me 11% përgjatë 2016-ës.

Trendi udhëhiqet nga aksionet e kompanive të udhëtimit, që janë edhe performueset më të mira gjatë tre muajve të fundit. Nga ana tjetër, frika që lidhet me sigurinë në Europë po venitet.

Sulmet terroriste në Francë, i kushtuan hotelerisë në vend një humbje totale prej 675 milionë dollarësh gjatë 2016-ës. Por, gjatë tremujorit të katërt të 2016-ës dhe tremujorit të parë të këtij viti, turizmi në vend është rimëkëmbur ndjeshëm.

Markat e luksit në kontinent, si; Prada apo Hugo Boss raportojnë të gjitha rritje të ndjeshme të shpenzimeve nga turistët, kryesisht nga ata aziatikë. Shpenzimet në zonat duty-free ndërkohë janë rritur me 21% vetëm gjatë Janarit.

Në Francë rritja fiskohet në 20%, ndërsa në Britani në 45%. Edhe kompanitë ajrore raportojnë një rritje të fluksit të udhëtimeve turistike me 8 deri në 10% gjatë dy muajve të parë të vitit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.