Turizëm në çdo ditë të vitit, Klosi në Radhimë: Mbrojtja e natyrës prioriteti ynë kryesor
Një qendër informacioni do të jenë në dispozicion të të gjithë turistëve që duan të vizitojnë Parkun Kombëtar Detar Karaburun Sazan.
Gjatë ceremonisë së inaugurimit të qendrës Ministri i Turizmit dhe Mjedisit, Blendi Klosi vlerësoi investimin duke vënë theksin në bashkërendimin e përpjekjeve për ruajtjen e mjedisit dhe zhvillimin e turizmit jo vetëm në një ditë apo sezon por gjatë gjithë vitit.
“Jemi jo më kot në një ditë jashtë sezonit turistik, për t’i dhënë kuptim zgjatjes dhe jetëgjatësisë më të madhe të zhvillimit të turizmit në vendin tonë. Vlora dhe shumë zona të tjera, të cilat kanë potenciale të vërteta turistike, është e patolerueshme dhe e pafalshme dhe aspak logjike që të shfrytëzohen vetëm brenda sezonit turistik”.
Ministri Klosi theksoi se mbrojtja e natyrës do të vazhdojë të jetë një prioritet kryesor i ministrisë.
“Në përpjekjet e Ministrisë së Turizmit dhe e Mjedisit mbrojtja e natyrës do të vazhdojë të jetë një prioritet kryesor. Po ashtu aksioni ynë i madh për pastrimin e Shqipërisë, edhe nga kjo pikë merr një frymëmarrje tjetër. Prandaj përpjekja jonë deri në fillimin e sezonit të ri turistik, pra deri në fillim të muajit maj të vitit të ardhshëm do të jetë e fokusuar tek pastërtia, tek ngritja e qendrave të tilla informacioni për ata që duan të shfrytëzojnë sezonin turistik, por edhe bashkërendimi i punonjësve të industrisë së mjedisit dhe turizmit së bashku me bizneset lokale, së bashku me partnerët tanë lokalë, biznesmenë të kësaj fushe dhe natyrisht së bashku me partnerët tanë ndërkombëtarë dhe me organet e tjera si Universiteti i Vlorës dhe shkollat e Vlorës për të pasur një aksion kombëtar për përgatitjen e një viti shumë të suksesshëm turistik në vitin 2018”.
Qendra e Vizitorëve të Parkut Kombëtar Detar Karaburun-Sazan në Radhimë është lokalizuar në një pikë strategjike për promovimin e parkut të parë dhe të vetëm detar në Shqipëri, duke qenë lehtësisht e aksesueshme nga vizitorët.
Përveç kësaj qendre edhe katër Qendra Vizitorësh janë në përfundim e sipër si në Parkun Kombëtar Dajt, Llogara, Divjakë-Karavasta, Theth.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.