Turizëm në zonat e mbrojtura, tarifa të kripura – 1 mijë dollarë 1 minutë filmim, kampingu me çadër 300 lekë/dita, parkimi i veturës 150 lekë
Zonat e mbrojtura do të përdoren nga individët për qëllime turistike apo nga subjektet për qëllime shkencore vetëm në bazë të pagesës. Madje në rastet kur peizazhet në këto zona fotografohen apo filmohen, ato do të tarifohen me çmime mjaft të kripura. Këshilli i Ministrave ka miratuar më 24 dhjetor të vitit të shkuar një Vendim përmes të cilit përcaktohen tarifat e përdorimit për qëllime të ndryshme të zonave të mbrojtura, të cilat do derdhen në arkën e shtetit.
Tarifat për qëllime të ekoturizmit nisin nga 50 lekë në ditë për vizitorët në këmbë apo në biçikleta, 150 lekë në ditë për veturat, e 500 lekë në ditë për autobuzët.
Kampingje individuale ose kolektive, do të lejohen ekskluzivisht në zonat e dedikuara posaçërisht për këtë qëllim me tarifat si më poshtë:
Çadra kampingu deri në 3 veta 150 lekë/ditë/çadër; Çadra kampingu mbi 4 veta 300 lekë/ditë/çadër; Ruleta 500 lekë/ditë; Baraka druri 1 000 lekë/ditë/barak.
Ndërkohë që vërtetë të kripura do jenë tarifat e fotografimit apo filmimeve që do bëhen në zonat e mbrojtura. Filmimi i imazheve të peizazheve, florës dhe faunës së egër apo dhe objekteve të ngjashme të territorit të ZMM-së (përveç rastit të ushtrimit të së drejtës gazetareske) paguhet një tarifë e përcaktuar, si më poshtë: – xhirimet e planifikuara për kinematë 100 000 lekë për çdo minutë deri në 20 minuta dhe 40 000 lekë për çdo minutë të njëpasnjëshme; – produktet televizive, multimediale ose videoklipe 80 000 lekë për çdo minutë regjistrimi deri në 10 minuta dhe 40 000 lekë për çdo minute të mëvonshme; – prodhimin e spoteve reklamuese 40 000 lekë për çdo sekondë të kohëzgjatjes.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.