Turizmi detar në “boom” – Rritje me 5.5% gjatë 2016-ës, forum në Budva
Të dhënat e fundit tregojnë se turizmi detar në zonën e Adriatikut është rritur ndjeshëm gjatë vitit të kaluar, si dhe premton për një rritje edhe më të madhe gjatë këtij viti. Pikërisht sektorit do t’i dedikohet një forum ndërkombëtar që do të mbahet në Budva të Malit të Zi, më 27 dhe 28 prill.
Sektori në këtë rajon regjistroi një rritje prej 5.5% në numër pasagjerësh gjatë vitit të kaluar, ose 5.5 milionë pasagjerë. Të dhënat i referohen linjave të kroçerave. Në vend të parë qendron Italia me 2.1 milionë pasagjerë dhe ndiqet nga Kroacia e Greqia.
Porti i preferuar i kroçerave në Adriatik konfirmohet Venezia, që mbledh 31.7% të totalit, duke lënë pas Dubrovnikun në Kroaci dhe Korfuzin në Greqi. Rritje regjistron edhe trafiku detar i trageteve tradicionale dhe katamaranëve, me 3.5% në një vit.
Në krye të listës qëndron porti i Igumenicës në Greqi, ndërkohë që ai i Barit renditet i pesti. Turizmi i kroçerave ka qenë vazhdimisht aktiv në rajon, dhe me problemet e sigurisë që po kalon Turqia shumë linja kanë vendosur që këtë vit të vendosin si destinacion në itinerarin e tyre edhe Shqipërinë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.