“Turizmi i pensionistëve”/ Portugalia mund të prishë “parajsën” e taksave! A mund të përfitojë Shqipëria që po i heq ato?
Portugalia, që për momentin konsiderohet një parajsë për pensionistë francezë, italianë e gjermanë për shkak të politikës fiskale që ofron për pensionet por edhe për klimën, rrezikon që pas pak kohësh të mos jetë më e tillë.
Kjo mund të ndodhë në rast se një nismë e ndërmarrë nga socialistët portugezë merr miratimin nga parlamenti. Shumë pensionistë të huaj janë transferuar atje për të kaluar moshën e pensionit për faktin se të ardhurat e tyre nuk taksohen. Kushti është që ata duhet të kalojnë atje të paktën 6 muaj në vit.
Por situata mund të ndryshojë sepse nisma e propozuar parashikon një taksë 10 % për të ardhurat e pensionistëve e kjo mund të prishë “parajsën” e krijuar, duke i detyruar pensionistët që të transferohen në vende të tjera, ku regjimi fiskal është i favorshëm,ashtu si edhe klima. Ndërsa evidenton nismën e re, shtypi italian përmend situatën e pensionistëve italianë që marrin çeqe pensioni shumë më të larta sesa po të qendronin në Itali.
Nisma shqiptare
Edhe Shqipëria po tenton të kthehet në një “parajsë”për pensionistët e huaj. Vitet e fundit, Shqipëria ka njohur mjaft raste kur për arsye të regjimit fiskal, pensionistë italianë transferohen të jetojnë në Shqipëri ku kostoja e jetëses është më e ulët dhe të ardhurat e tyre nga pensioni u mundësojnë një jetesë më të mirë sesa në Itali. Një akt normativ i Ministrisë së Shtetit për Diasporën parashikon përcaktimin dhe zbatimin e normave për përjashtimin nga tatimi mbi të ardhurat për shtetasit e huaj dhe shtetasit e huaj me origjinë shqiptare që përfitojnë pension, me vendqëndrim në territorin e Republikës e Shqipërisë, raporton SCAN.
Duke realizuar këtë qëllim, qeveria shqiptare zgjeron hapësirën e lehtësimeve e të mundësive për shtetasit e huaj dhe shtetasit e huaj me origjinë shqiptare për të zgjedhur Shqipërinë si vendbanimin e tyre pas daljes në pension.
Efektet e pritshme të aktit normativ janë përjashtimi nga tatimi mbi të ardhurat për shtetasit e huaj me origjinë shqiptare ose shtetasit e Bashkimit Evropian me leje qëndrimi në Republikën e Shqipërisë, të cilët marrin pension sipas legjislacionit të vendit ku e përfitojnë atë dhe shtetasit e huaj, të cilët kanë përfituar shtetësinë shqiptare me vendqëndrim në Republikën e Shqipërisë.
Zbatimi i aktit normativ pritet të ndikojë në rritjen e lëvizjes së shtetasve të huaj në drejtim të Shqipërisë, forcimin e lidhjeve të shtetasve shqiptarë që jetojnë jashtë me vendin e origjinës, rritjen e kërkesës për shërbime në nivel vendor, zhvillim të ofertës për shërbime, kujdes e turizëm” shkruhet në relacionin e nismës.
“Oferta” shqiptare për pensionistët e huaj
Për të përfituar nga përjashtimi nga tatimi mbi të ardhurat, personat përfitues duhet të plotësojnë kushtet e mëposhtme:
a) Të jenë përfitues të pensionit sipas legjislacionit në fuqi në vendet ku e kanë përfituar atë;
b) Të jenë pajisur me leje qëndrimi në territorin e Republikës së Shqipërisë;
c) Të mos kenë qenë ndonjëherë të dënuar në shtetin e vet apo në Republikën e Shqipërisë ose në ndonjë shtet tjetër për vepra penale, për tëcilat ligji parashikon dënime me jo më pak se 3 (tre) vjet heqje lirie;
ç) Të kenë marrë përgjigje pozitive nga struktura përgjegjëse administrative për përjashtim nga tatimi mbi të ardhurat personale të përfitimit të pensionit.
Personat përfitues humbasin të drejtën e përjashtimit nga tatimi mbi të ardhurat në kushtet e mosripërtëritjes së lejes së qëndrimit në Republikën e Shqipërisë, kur për këtë nuk është bërë kërkesë në strukturat përgjegjëse deri 6 (gjashtë) muaj nga data e mbarimit të lejes. Në rast përgjigjeje negative ose të mungesës së përgjigjes nga struktura përgjegjëse administrative, brenda afateve ligjore të parashikuara, palës së interesuar i lind e drejta për ankimim administrativ sipas parashikimeve të Kodit të Procedurave Administrative.
Edhe pse nuk ka një shifër zyrtare, vlerësohet se janë disa qindra pensionistë italianë që ndodhen në Shqipëri për të jetuar për shkak të kostos së ulët të jetësës dhe klimës. Zona e preferuar është kryesisht Durrësi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.