Turizmi mjekësor – Turqia, vendi me tarifat më të ulëta në Europë. Parashikon 1 mln pacientë në 2019

Turqia pritet të rifitojë popullaritetin e saj si një destinacion turistik midis udhëtarëve ndërkombëtar. Ndaj, vendi po zhvillon të gjithë sektorët e tij, duke përfshirë edhe turizmin mjekësor. Implantet e flokëve dhe transplantet e veshkave me kosto prej 35 mijë dollarë janë ende shumë të njohura.

Qeveria e Erdoganit ka investuar më shumë se 30 milionë dollarë në turizmin mjekësor në Turqi gjatë dhjetë viteve të fundit. Numri i njerëzve që udhëtojnë në Turqi për impiantet e flokëve ka ardhur duke u rritur çdo vit. Paketa e plotë (udhëtimi, kirurgjia, akomodimi, shërbimi i aeroporti dhe shërbime të tjera) është më e lirë se vetëm kirurgjia në çdo vend tjetër të Europës.

Pacientë të tjerë kërkojnë trajtime të kancerit, shumë prej të cilëve janë rusë dhe irakianë. Sistemi shëndetësor turk është gjithashtu shumë i njohur për trajtimet e tij pediatrike dhe transplantet e organeve. Për një veshkë, një i huaj paguan 30-35 mijë dollarë amerikanë, ndërsa një transplantim i mëlçisë mund të arrijë deri në 90 mijë dollarë (rreth 72 mijë euro) nëse procedura kryhet në një spital privat.

Procesi mbikëqyret nga një komitet etik i cili merr organin për transplantimin e veshkave ose të mëlçisë tek pacientët e huaj nëse ato shoqërohen nga donatorët e tyre.

“Ata duhet të vijnë me donatorin e tyre, i cili duhet të jetë anëtar i familjes deri në brezin e katërt dhe më pas të bindë bordin etik se nuk ka transaksion monetar në mes, as presion të asnjë lloji”, thotë Emin Çakmak, kryetar dhe themelues i Këshillit të Udhëtimit Turistik të Turqisë.

Këshilli pret të arrijë një milion pacientë në vitin 2019 dhe deri në 2 milionë deri në vitin 2023. Në vitin 2016, pas një raporti të kësaj organizate, u trajtuan mbi 750 mijë pacientë të ardhur nga 144 vende të ndryshme, duke gjeneruar rreth 6 miliardë të ardhura për ekonominë turke.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.