Turizmi rrit vizitat në parqet arkeologjike e muzetë – Tremujori i dytë, 136 mijë vizitorë më shumë
Shtimi i numrit të vizitorëve të huaj në Shqipëri ka rritur ndjeshëm interesin edhe ndaj trashëgimisë kulturore të vendit. Kjo vihet re edhe nga numri i vizitave në muzetë, kalatë dhe parqet arkeologjike.
Gjatë tremujorit të dytë të këtij viti numri i vizitorëve drejt këtyre vendeve është rritur me 73 për qind. Pra, ka pasur pothuaj 136 mijë turistë më shumë, sesa në tremujorin e dytë të vitit të kaluar.
Krahasuar gjithmonë me këtë periudhë numri i turistëve që kanë frekuentuar muzetë është rritur me 48 mijë, pra 85 për qind më shumë. Përsa i përket numrit të turistëve që kanë vizituar kalatë apo monumentet e tjera të kulturës, është rritur me më shumë se 39 mijë, pra 68 për qind më shumë. Në parqet arkeologjike vihet re një shtim prej 47 mijë vizitorësh. Në këtë grup janë muzetë ato që kanë regjistruar edhe rritjen më të madhe të vizitorëve.
Nuk mund të themi të njëjtën gjë përsa i përket frekuentimit të Bibliotekës Kombëtare. Gjatë tremujorit të dytë të këtij viti numri i frekuentuesve të Bibliotekës Kombëtare ka pësuar një rënie prej 37 për qind. Një rënie prej pothuaj 45 për qind ka pësuar edhe numri i botimeve të reja, krahasuar me tremujorin e dytë të 2017.
E.T /SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.