Turizmi, Shqipëria në informalitet shifrash – Jemi i vetmi vend për të cilin Eurostat nuk raporton të dhëna

Ndërkohë që turizmi mban ¼ e Prodhimit të Brendshëm Bruto të Shqipërisë, e ndërkohë që të gjithë sytë janë kthyer nga sektori si përcaktuesi vendimtar i ecurisë së ekonomisë shqiptare në një kohë që pandemia ka shkaktuar dëme të jashtëzakonshme, ky sektor është në informalitet shifrash. Një publikim i fundit i Eurostat mbi turizmin për vendet kandidate, për Shqipërinë ka vetëm një lajm; atë se mungojnë tërësisht shifrat.

Në çdo statistikë e tabelë, Shqipëria është i vetmi vend kandidat ku nuk ka shifra për kapacitetet e sektorit, sidomos kapacitetet akomoduese. Për Shqipërinë mungojnë edhe shifrat e qëndrimeve nëpër hotele, sidomos për të huajt, ndërkohë që të gjitha vendet e rajonit i raportojnë këto të dhëna, e madje vende si Mali i Zi i raportojnë periodikisht, çdo muaj.

Vetë instituti jonë i statistikave ndërkohë raporton vitin 2016 të fundit kur shifrat mbi kapacitetet akomoduese, shtretër për banor, janë rifreskuar. Pa shifra mbi kapacitetet e sektorit, e sidomos në mungesë totale të shifrave për fluksin që këto struktura përballojnë, politikbërja dhe zhvillimi i mëtejshëm i sektorit bëhen thuajse të pamundura.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.