Turqia mund të jetë rritur me 20% në T2 / Ministri i financave flet me optimizëm. Prezantohen masat për inflacionin
Ekonomia turke pritet të jetë rritur me rreth 20% në tremujorin e dytë të këtij viti dhe të zgjerohet sipër pritshmërive të qeverisë prej 5.8% në vitin e plotë 2021, sipas ministrit të Financave Lutfi Elvan. Ministri tha gjithashtu në një fjalim ndaj bizneseve se qëndrimi i Bankës Qendrore ndaj stabilitetit të çmimeve është i rëndësishëm dhe se masa makroprudenciale do zbatohen për të luftuar inflacionin. Një dekret i publikuar në mediat lokale, tregoi se Turqia, për të lehtësuar presionet inflacionit, do të zgjasë taksën ndaj produkteve të alkoolit dhe duhanit deri në fund të vitit. Turqia po përpiqet të ulë inflacionin që ka qëndruar në një normë dyshifrore për pjesën më të madhe të 4 viteve të fundit. Dekreti presidencial tregoi se taksa fikse do mbahet e pandryshuar për 6 muaj të tjerë. Pijet alkoolike dhe produktet e duhanit përbëjnë 6.06% të shportës së inflacionit. Qeveria ka rritur çmimet dhe taksat vetëm tek zërat që kanë ndikim të limituar tek inflacioni këtë vit. I vetmi përjashtim deri më tani ka qenë rritja e çmimeve të karburantit në muajin e kaluar.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.