Turqia s’ka nevojë për FMN! Ministri Albayrak: Vendi do të dalë më i fortë nga kjo krizë
Ministri i Thesarit dhe i Financave në Turqi, Berat Albayrak deklaroi se vendi nuk ka asnjë plan për të kërkuar asistencë nga Fondi Monetar Ndërkombëtar, për të përballuar vështirësitë ekonomike, apo kontroll të kapitalit.
Ministri turk i bëri këto deklarata ndërsa përpiqej të qetësonte investitorët ndërkombëtarë. Berat Albayrak konfirmoi, gjatë një konference me rreth 3 mijë investitorë, se Ankaraja mbetet e angazhuar për tregun e lirë.
Albayrak pranoi se Turqia i njeh të gjitha sfidat e brendshme dhe do të dalë më e fortë nga kjo paqëndrueshmëri e tregut. Sipas tij Ankaraja zyrtare do të respektojë disiplinën fiskale dhe do të luftojë inflacionin, duke u fokusuar në tërheqjen e investimeve të huaja direkte.
Ndërkohë, Turqia do të shkurtojë shpenzimet publike dhe të gjitha ministritë kanë një program ambicioz në këtë fushë. Shtetet e Bashkuara të Amerikës dhe Turqia janë përfshirë prej disa ditësh në një mosmarrëveshje komplekse diplomatike dhe tregtare, lidhur me ndalimin e pastorit amerikan, Andrew Brunson, nga ana e Turqisë. Presidenti amerikan Donald Trump dyfishoi tarifat për eksportet e metaleve turke në Shtetet e Bashkuara, gjatë javës së kaluar. Në përgjigje, Ankaraja rriti tarifat ndaj produkteve amerikane, si automjetet, duhanin dhe alkoolin.
Sipas ministrit, Berat Albayrak, shumë vende anembanë botës po përballen me tarifa ose sanksione nga ana e SHBA dhe për këtë arsye reagimi ndaj ekonomisë më të madhe në botë duhet të jetë i koordinuar.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.