Turqit janë varfëruar këto 5 vite- Ekonomia ka humbur $202 miliardë nga 2013

Turqia është varfëruar me 202 miliardë dollarë në 5 vitet e fundit, diçka që rrit shqetësimet te autoritetet financiare të vendit.  Sipas të dhënave të Shërbimit turk të Statistikave,  Produkti i Brendshëm Bruto i Turqisë kishte arritur një nivel rekord të lartë prej 950 miliardë dollarë në vitin 2013.

Në 2019-ën, ekonomia ka rënë në 748 miliardë dollarë.  Kjo rënie me 202 miliardë dollarë përbën një çështje për vendin,  ndërkohë që suksesi i presidentit Recep Tayyip Erdogan është përkthyer te njerëzit me rritjen e pasurisë, ndërkohë që Produkti i Brendshëm Bruto është trefishuar që prej vitit 2002.

Të gjithë turqit janë varfëruar nga viti 2013, ndërkohë që PBB për frymë në vitin 2019 ka rënë në 9,076 dollarë, nga 12,500 që qëndronte atëherë. Sipas të përditshmes Birgun, papunësia tek të rinjtë është rritur nga 16% në 26%, ndërsa inflacioni është rritur nga 7% në 20%, në 5 vitet e fundit.

Ministri i Financave Berat Albayrak, ka premtuar se në muajt e ardhshëm, ekonomia do të balancohet.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.