Turqit, në ndihmë të ekonomisë – Këmbejnë euron dhe dollarin me lirën, stabilizohet monedha

Shumë njerëz në Turqi po këmbejnë monedhat e huaja me lirën turke, për të ndihmuar në stabilizimin e ekonomisë së vendit, pas konflikteve tregtare dhe diplomatike me Shtetet e Bashkuara të Amerikës.

Presidenti i Turqisë, Recep Tayyip Erdogan, i ka bërë thirrje popullit turk në ditët e fundit të shkëmbejnë monedhat e huaja me lirën, për të ndihmuar në stabilizimin e monedhës, që është zhvlerësuar ndjeshëm përballë dollarit amerikan. Shumë persona i janë përgjigjur thirrjes së presidentit, duke shkuar në pikat e këmbimit valutor për të kthyer dollarët dhe eurot në lira.

“Çdo ditë agjencitë po këmbejnë nga 100 mijë deri në 300 mijë dollarë. Populli turk e mbështet presidentin Erdogan. Po e bëjmë këtë për ekonominë tonë”, shprehet Onur Canozkar, drejtor i një agjencie këmbimi valutor në Stamboll.

Banorët vendas e cilësojnë si një detyre patriotike këmbimin e monedhave të huaja, në mënyrë që të ndihmojnë ekonominë e vendit. “Ne gjithmonë e mbështesim vendin tonë. Shpresoj që ekonomia turke të përmirësohet dhe të mos varemi nga Shtetet e Bashkuara”, shprehet një banor i Stambollit.

Zhvlerësimi i lirës turke filloi kur Uashingtoni vendosi sanksione ndaj Turqisë, duke dyfishuar tarifat për çelikun dhe aluminin, për shkak të arrestimit të pastorit, Andrew Brunson. Por, Turqia ka marrë një sërë masash për të stabilizuar vlerën e lirës. Për shembull, rregullatori bankar turk rregulloi kufijtë e transaksioneve të këmbimit valutor, ndërsa qeveria tha se do të rrisë ndjeshëm tarifat e importit të disa mallrave nga SHBA. Për shkak të këtyre masave, vlera e lirës turke është stabilizuar, pasi preku nivelin më të ulët rekord prej 7.24 në raport me dollarit në mes të këtij muaji.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.