Tusk: Integrimi, nuk do të ndodhë brenda natës – Garanton mbështetjen e tij për Shqipërinë në procesin e bisedimeve

“Procesi i negociatave do të jetë i vështirë, por Shqipëria në fund do të anëtarësohet në Bashkimin Europian”. Ky ishte mesazhi që përcolli Presidenti i Këshillit Europian, Donald Tusk, gjatë vizitës së tij në Tiranë, ku u prit nga Kryeministri Edi Rama.

Pas ceremonisë së mirëseardhjes në Pallatin e Brigadave, Rama dhe Tusk mbajtën një konferencë për mediat, ku zbuluan disa detaje të takimit të tyre.

Rama e quajti Tusk një mik të Shqipërisë dhe shqiptarëve, ndërsa e siguroi se vendi do ta marrë me shumë seriozitet fazën e nisjes së negociatave.

“Të gjithë shqiptarët presin me padurim të vazhdojmë në këtë rrugë dhe të kemi sa më parë të jetë e mundur mbështetjen e plotë të të gjithë vendeve anëtarë për këtë rekomandim për nisjen e bisedimeve. Ne e shikojmë këtë dialog jo si një pikëmbërritje por si përfundimin e një faze dhe çeljen e një faze të re edhe më sfiduese në rrugën e anëtarësimit në Bashkimin Europian”, u shpreh Rama.

Presidenti i Këshillit të Europës u shpreh se tani nis një prej proceseve më të vështirë, por më të rëndësishëm për ecurinë e vendit. Sipas tij sfida do të nisë që me bindjen e shteteve anëtare për nisjen e negociatave, por Tusk u shpreh optimist nisur nga përvoja e tij.

“Është ëndrra ime që Shqipëria të ndjekë të njëjtin rrugëtim në BE si dhe Polonia, me historinë tuaj krenare dhe Skënderbeun që mbrojti Europën nga pushtimi, nuk kam asnjë dyshim se ju do ta bëni këtë dhe është në interesin më të mirë europian që Shqipëria dhe i gjithë rajoni të ndjekin këtë rrugë.

Por kjo nuk do të ndodhë brenda natës, do të ketë mjaft sfida, duke filluar me luftën kundër krimit dhe reformën në drejtësi”, tha Tusk.

Tusk do të vijojë turin e tij në Ballkanin Perëndimor në kuadër të Samitit të Përbashkët në Sofje. Pasditen e sotme ai do të vizitojë Malin e Zi, ndërsa në vijim do të kryejë vizita edhe në Beograd, Prishtinë, Sarajevë dhe Shkup.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.