TVSH e turizmit – Kërkohet mendimi i grupeve të interesit

Ulja e TVSH për turizmin pritet të japë impaktet e para te çmimet e strukturave hoteliere.

Në këtë të konsolidimit të projekt-vendimit të Këshillit të Ministrave për zbatimin e ndryshimeve në ligjin për TVSH-në, Ministrja e Financave, Helga Vukaj, e ka përcjellë këtë akt për vlerësim pranë Këshillit Tatimor si dhe grupeve të interesit, pas kërkesës së tyre.

Sipas njoftimit zyrtar të këtij dikasteri, Ministria e Financave ka përgatitur aktin dhe mbetet në pritje të vlerësimeve përfundimtare nga institucionet e mësipërme për miratimin e tij. Pjesë të konsultimit janë  grupet e interesit/dhomat e biznesit, me qëllim konsolidimin e këtij projekt-vendimi.

“Ministria e Financave nxit grupet e interesit/dhomat e biznesit dhe Këshillin Tatimor që sa më shpejt të japin vlerësimet e tyre në mënyrë që ndryshimet në Ligjin për TVSH-në të implementohen gjatë sezonit turistik të këtij viti”, thuhet ne njoftimin e Financave.

Ulja e TVSH-së në masën 6 % për strukturat akomoduese në fushën e turizmit pritet të nxisë investimet në këtë sektor jetik për ekonominë shqiptare. Implementimi i tij do të shoqërohet me rritjen e konkurrencës dhe uljen e çmimeve.

Vendimi  për uljen e TVSH-së për turizmin  u bë vetëm një muaj më parë  nga 20 % që ishte në 6%.  Ky vendim prek vetëm strukturat akomoduese dhe jo sektorët e tjerë të turizmit.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.