TVSH-ja me koncesion? Ahmetaj: Nuk do të ketë! Së shpejti, lehtësi fiskale për biznesin
Mbledhja e TVSH-së do të vijojë të kryhet nga strukturat shtetërore dhe nuk do të ketë procedurë koncesionimi. Në një dalje për mediat, Ministri i Financave dhe Ekonomisë, Arben Ahmetaj, ripërsëriti qëndrimin e tij, duke njoftuar edhe se janë parashikuar lehtësi fiskale për biznesin e vogël.
“Boloria politike ku flitet me demek për një taksë të re të biznesit të vogël, një koncesion për TVSh. Ua kam thënë dhe po e përsëris. Nuk ka pasur, nuk ka dhe nuk do të ketë koncesion për TVSh. Përkundrazi procedura që po bëjmë me biznesin e vogël është në favor të formalizimit dhe në favor të biznesit të vogël. Politikat nxitëse dhe lehtësuese në inisiativë të kryeministrit do të vazhdojnë dhe në muajt që vinë do të ftoheni ti dëgjoni”.
Ahmetaj ka bërë një pasqyrë të raportit të Bankës Botërore dhe progres-Raportit të Komisionit Evropian për Shqipërinë, ku theksoi se dy dokumentet konfirmojnë ecurinë pozitive të ekonomisë. Ahmetaj u ndal tek punësimi dhe pagat.
Duke cituar raportet, Ahmetaj theksoi se është vlerësuar me ecuri tejet pozitive sistemi bankar në vendin tonë.
Sa i përket sistemi fiskal, Ministri i Financave theksoi se po redukton pabarazinë dhe taksa progresive është në favor të shtresave më të varfra.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.