TVSH për biznesin e vogël – Naqellari: Jo më shumë se 4% TVSH të pagueshme mbi xhiron

Jo më shumë se 4% duhet të jetë TVSH e pagueshme mbi xhiron e deklaruar, për biznesin e vogël. Kështu është shprehur për televizionin SCAN, eksperti i ekonomisë Julian Naqellari. Sipas tij, efektet që priten janë pozitive pasi përvec formalizimit do të zbutet konkurrenca e pandershme.

“E para në efekt të konkurrencës. E dyta, mendoj se do të formalizojë pjesën e zinxhirit ku produktet apo shërbimet kalojnë nga njëra njësi tek njësia tjetër. TVSH e pagueshme mbi xhiron e deklaruar përfshirë TVSH-në, duhet të jetë në nivelin diku 3-4%. Pra, nëse një biznes i vogël me të ardhura të deklaruara 3 milionë lekë në vit përfshirë edhe TVSH-në do të ketë një kosto TVSH-je diku tek 100 mijë lekë, përfshirë edhe kostot administive 20 mijë lekë: 120 mijë lekë. Kështu që në muaj do të ketë një kosto diku prej 10 mijë lekësh”, tha Naqellari.

Lidhur me mundësinë për evazion fiskal pas vendosjes së TVSH, Naqellari u përgjigj:

“Mendoj se është një hap pozitiv, i pamjaftueshëm, sepse përsëri ka vend për të bërë evazion, ka vend që bizneset edhe pse janë pjesë e TVSH-së mund të mos deklarojnë të ardhurat e tyre edhe kjo mund përsëri të ndikojë në fshehjen e detyrimeve tatimore. Kërkohet patjetër nga ana e administratës një lloj vëmendjeje dhe kujdesi i veçantë ndaj këtyre bizneseve”, shtoi Naqellari.

Naqellari e vlerësoi të drejtë mospërfshirjen në TVSH të ambulantëve, pasi sipas tij puna e tyre është e pataksueshme.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.