TVSH për krijimtarinë letrare – Ymeri: Ulja në 5%, nxit krijimitarinë dhe ndikon në çmime
Ulja e TVSH së krijimtarisë letrare nga 20% në 5 % dhe futja në këtë skemë edhe të subjekteve që prodhojnë dhe shesin libra por që nuk paguajnë, do të sjellë jo vetëm më shumë tituj dhe ulje të çmimit të librave por edhe shmangien e rrjedhjes fiskale. Kështu ka deklaruar Kryetari i Shoqatës së Botuesve, Petrit Ymeri për televizionin SCAN. Ymeri deklaroi se shtypshkronjat duhet të jenë të ndara nga shtëpitë botuese me NIPT-in e tyre.
Lidhur me çmimin e librave Ymeri theksoi se nuk janë të larta, madje në edicionin e 20 të panairit të librit, shtëpitë botuese kanë ofruar ulje çmimi nga 10 deri në 50%. Kurse për titujt ekonomikë kreu i shoqatës u shpreh se këtë vit nuk ka shumë prurje.
Sipas kritikëve të artit, risi për këtë vit është rritja e prurjeve të titujve në shqip.
Ndryshe nga vitet e tjera, blerja e librave nga lexuesit ka nisur që në ditët e para të panairit. Qytetarët shprehen se çmimet janë të përballueshme.
Edicioni i 20-të i panairit të librit ka një pjesëmarrje të gjerë të botuesve nga Shqipëria, Kosova , Maqedonia dhe Mali i Zi. Ky panair do të qëndrojë i hapur deri më 19 nëntor.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.