U mbyll me 14.8 mld lekë minus – Buxheti faktik në Kuvend/ 8 mld lekë investime në “stok”
Arka e shtetit u mbyll me rreth 14.8 miliardë lekë më pak vitin që lam pas, nga plani vjetor fillestar, apo me një realizim në masën 97 për qind duke arritur në total në rreth 449.9 mld lekë. Ministria e Financave dhe Ekonomisë ka hartuar projektligjin për buxhetin faktik, ku dhe janë publikuar të dhënat, i cili do të diskutohet në komisionet parlamentare, për t’u miratuar më tej në Kuvend. Ndërsa nga plani i rishikuar, diferenca është rreth 12 miliardë lekë.
Performancë më të dobët në këtë drejtim kanë pasur të ardhurat nga tatimet dhe doganat doganore me realizim 96 për qind, me nivel të ardhurash. Vetëm nga TVSH-ja, krahasuar me buxhetin fillestar, mungojnë rreth 8.2 miliardë lekë, me realizim në masën 95 për qind dhe 4 miliardë lekë dhe akciza nga karburanti dhe renta minerare me 92 për qind, ku janë mbledhur për të gjithë vitin rreth 45 miliardë lekë. Ministria e Financave ka pasur performancë pozitive në mbushjen e arkës së shtetit me të ardhurat nga tatim-fitimi mbi bizneset dhe taksat nacionale, duke tejkaluar planin. Konkretisht të ardhurat nga “Tatimi mbi Fitimin” janë realizuar në vlerën 34.5 miliardë lekë dhe realizim në masën 100% të planit.
Ndërsa taksat nacionale dhe të tjera, në masën 101% e planit, apo rreth 38.6 miliardë lekë. Ndërkaq, me mosrealizim paraqiten edhe investimet, ku 2018 është mbyllur në masën 91 për qind dhe apo me rreth 8 miliardë lekë të pashpërndara. Sa i takon borxhit, sipas dokumentit të Financave, në fund të vitit 2018, Borxhi Publik u vlerësua në nivelin 1,107.3 miliard Lekë ose 67.2% e PBB. Krahasuar me fundin e vitit të kaluar, niveli i borxhit publik në raport me PBB ka shënuar një rënie prej 2.9 pikë përqindje.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.