Udhëheqësit e BE-së bien dakord për sanksione të reja ‘masive dhe të rënda’ ndaj Rusisë!
Udhëheqësit e BE-së mbajtën një samit urgjent në Bruksel të enjten mbrëma në vazhdën e pushtimit rus të Ukrainës dhe ranë dakord për sanksionet e krijuara për të imponuar “pasoja masive dhe të rënda” ndaj Moskës.
“Këto sanksione mbulojnë sektorin financiar, sektorin e energjisë dhe transportit, mallrat me përdorim të dyfishtë, si dhe kontrollin e eksportit dhe financimin e eksportit, politikën e vizave, listimet shtesë të individëve rusë dhe kriteret e reja të listimit”, thuhet në përfundimet.
“Rusia mban përgjegjësi të plotë për këtë akt agresioni dhe të gjitha shkatërrimet dhe humbjet e jetëve që do të shkaktojë. Ajo do të mbajë përgjegjësi për veprimet e saj.”
Detajet nuk do të bëhen të disponueshme deri të premten. Këshilli thotë se do “të miratojë pa vonesë” propozimet e përgatitura nga Komisioni dhe kryediplomati. Ai gjithashtu rekomandon një paketë të mëtejshme masash kundër Bjellorusisë.
Udhëheqësit e BE-së fluturuan për në Bruksel me dy qëllime kryesore: të shfaqin unitetin e 27 vendeve anëtare dhe të bien dakord për një paketë të re, më radikale sanksionesh kundër Kremlinit.
Siç pritej, përjashtimi i Rusisë nga sistemi i pagesave SWIFT nuk ishte përfshirë në masat, të paktën për momentin. Me bazë në Belgjikë, SWIFT lidh më shumë se 11,000 institucione financiare në mbarë botën. Presidenti Vladimir Putin dhe ministri i Punëve të Jashtme Sergei Lavrov nuk pritej të shënjestroheshin personalisht.
Komisioni Europian ka hartuar paketën e sanksioneve në bashkëpunim të ngushtë me shtetet anëtare. Puna filloi javë më parë kur tensionet në kufirin me Ukrainën u intensifikuan. Të marra së bashku, masat janë krijuar për të kufizuar ndjeshëm aksesin jetik të Moskës në tregun e kapitalit dhe të shërbimeve financiare të BE-së, duke bllokuar në mënyrë efektive rifinancimin e borxhit të saj kombëtar sovran.
Por dëmi nuk do të jetë aspak i njëanshëm. Blloku është partneri më i madh tregtar i Rusisë, që përbën 37.3% të tregtisë totale të vendit në mallra në vitin 2020. Duke pasur parasysh lidhjet e shumta tregtare me fqinjin e tyre, vendet evropiane në mënyrë të pashmangshme do të vuajnë nga hakmarrja në një masë më të madhe ose më të vogël.
Një sfidë kryesore për liderët është se si t’i shkaktojnë Rusisë dhimbjen më të madhe duke minimizuar goditjen për vendet anëtare. Më herët të enjten, dolën raporte se Italia ishte veçanërisht e shqetësuar për pasojat për industrinë e saj fitimprurëse të luksit.
Duke folur në kushte anonimiteti, zyrtarët e BE thanë se çështja e kompensimit monetar për vendet, ekonomia e të cilave është dëmtuar ishte “shumë e parakohshme” për t’u analizuar. Zyrtarët vunë në dukje se Gjermania dhe Holanda vlerësohen të jenë vendet më të cenueshme ndaj humbjeve ekonomike.
Përveç Kremlinit, Këshilli Europian gjithashtu dëshiron të ndëshkojë Bjellorusinë, një vend që ka lejuar trupat ruse të hyjnë në Ukrainë mbi kufirin e tyre. Veprimi kundër regjimit të Aleksandër Lukashenkës do të hartohet më vonë, tha Këshilli në konkluzionet e tij. Vendi tashmë është subjekt i një grupi të veçantë sanksionesh të vendosura si rezultat i krizës kufitare të migracionit të vitit 2021.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.