Udhëtimi i së ardhmes: Linate dhe Malpensa udhëheqin garën për taksitë ajrore
Italia po studion planin për të zhvilluar një rrjet vertiportesh nga ku do të nisë ‘shërbimi i së ardhmes’
Sea, kompania që menaxhon aeroportet Linate dhe Malpensa, në bashkëpunim me Skyports, po studion një plan për të zhvilluar një rrjet vertiportesh nga të cilët do të nisë një shërbim transporti taksi i së ardhmes. Ata nuk do të jenë helikopterë të thjeshtë, siç po ndodh tashmë në SHBA ose në Sao Paulo në Brazil sepse për të transportuar klientët do të jenë të ashtuquajturit ‘eVtol’, të cilët janë avionë elektrikë, mes një aeroplani të vogël dhe një helikopteri, të aftë për t’u ngritur dhe ulur vertikalisht.
Aeroportet milaneze, me Linate në rreshtin e parë, pasi është vetëm 6 kilometra nga qendra e qytetit, mund të jenë aeroportet e parë në Itali që do të presin fusha vertiportesh brenda territorit të tyre të aeroportit.
Qëllimi i marrëveshjes Sea-Skyports, është të studiojë “mundësinë për të zhvilluar dhe menaxhuar një rrjet vertiportesh në Itali, duke filluar nga Milano”. Teknologjia e re, nënvizojnë dy kompanitë e përfshira, do të lejonte “lidhjen pikë-pikë, 100% pa karbon, lidhje brenda qytetit dhe ndërqytetas, duke lehtësuar kështu ndjeshëm trafikun e makinave urbane”.
E ashtuquajtura lëvizshmëri ajrore e avancuar, e mbështetur fuqimisht nga ENAC (Autoriteti Kombëtar i Aviacionit Civil), mund të fillojë operacionet tregtare në kohë për të ofruar një shërbim të qëndrueshëm gjatë Olimpiadës Dimërore 2026. Taksitë fluturuese pritet të debutojnë në treg deri në vitin 2025.
Në Londër, për shembull, po studiohen lidhjet midis Aeroportit Heathrow dhe rrethit financiar të Canary Wharf. Fluturimet do të zgjasin 15 minuta dhe kushtojnë 50 paund për pasagjer. Javët e fundit, NASA ka filluar, në një bazë fluturimi në Kaliforni, një cikël testimi për të testuar avionin e tij të vogël, 100% elektrik, me ngritje dhe ulje vertikale eVtol. NASA beson fuqimisht në avionët eVtol të cilët, në të ardhmen, mund të veprojnë si taksi fluturuese midis qyteteve dhe për udhëtime të shkurtra, si dhe shërbime mjekësore urgjente dhe transport për mallra dhe objekte.
Ilsole24ore
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.