“Ujësjellësit punësojnë militantë”/ ERRU, “ujë të ftohtë” shoqërive: S’kanë kualifikimet e duhura

Sektori i ujësjellës–kanalizimeve vazhdon të karakterizohet nga punësime me baza militantizimi partiak dhe jo mbi baza të nevojave reale të shoqërive për shtesë stafi dhe sipas kualifikimeve të duhura”. Problematika vihet në pah nga Bilanci i Ujit për vitin 2019, i publikuar së fundmi nga Enti Rregullator i Ujit, duke nxjerrë në pah se treguesi për efiçencën e stafit në këto shoqëri krijon kosto të larta e të panevojshme.

Sipas raportit, eficenca e stafit përfaqëson numrin e stafit të shoqërisë për 1000 lidhje , teksa gjatë vitit 2019 numri total i punonjësve në sektorin UK është rritur me 336.Treguesi i performancës së Eficences së Stafit për vitin 2019 është mesatarisht 5,33 staf/1000 lidhje UK, me një përmirësim të vogël prej (0.2 staf/1000 lidhje UK), por që akoma qëndron larg nivelit të kërkuar. Raporti vlerëson se ujësjellësit operojnë me një numër të lartë punonjësish, që në mjaft raste nuk përputhen me kërkesat dhe përshkrimet e vendit të punës.

Vetëm disa shoqëri, si ajo e  Korçës, Tiranës,  Kamëz, Sarandës, Berat Kuçovës apo Lezhë plotësojnë kushtin ku efiçenca e stafit është në nivele bashkëkohore.  Sipas Bilancit të Ujit, “Uji Pa të Ardhura” rezulton në nivelin 63.82%, me tendencë të lehtë përmirësimi krahasuar me vitin 2018. Ndërkaq, rreth 63% e ujit që prodhohet humbet në rrjet, teksa humbjet administrative përbëjnë 54% të humbjeve të përgjithshme, gjë që tregon mbi domosdoshmërinë imediate të përmirësimit të menaxhimit nga stafi i ujësjellësve.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.