UKT vijon me investime – 32.9 mln lekë për të ndryshuar infrastrukturën ekzistuese të pajisjeve

Ujësjellës Kanalizime Tiranë pas marrjes së vendimit nga Bashkia e Tiranës për rritjen e çmimit të ujit vijon punën me ritme të shpejta për të “ndryshuar” infrastrukturën e saj.

Pas tenderit për shtimin e impiantit të Bovillës, një tjetër tender është hapur nga ky institucion. Bëhet fjalë për blerje të pajisjeve network për UKT, kjo blerje ka si fond limit 32.9 milionë lekë pa TVSH dhe financohet nga USAID.

UKT përdor infrastrukturën ekzistuese për të ofruar shërbime të avancuara dhe aplikacione për stafin e brendshëm, partnerët dhe për klientët. Aktualisht UKT nuk ka një infrastrukturë të konsoliduar VPN, dhe degë të ndryshme përdorin pajisje të vjetra me kapacitete të limituara dhe me konfigurime të ndryshme.

Sipas UKT infrastruktura aktuale është mjaftë komplekse dhe limiton implementimet e nevojshme të politikave të sigurisë.

Ky investim ka si qëllim që të përmirësojë rrjetin në degë duke ndërtuar një rrjet të unifikuar për UK. Gjithashtu do të ketë përmirësim dhe rritje të sigurisë dhe cilësisë për aksesimin e aplikacioneve, shërbimeve dhe të dhënave që janë në funksion të punonjësve të UKT dhe klientëve të saj.

Implementimi i pajisjeve të rrjetit dhe sigurisë do garantojnë komunikim të pavarur, të sigurt dhe të koduar për të gjithë punonjësit e UKT me vendndodhje në Zyrat Qendrore, Degë dhe ata në distancë.

Fituesi i tenderit do të shpallet më 28 gusht dhe afati i përfundimit të punimeve do të jetë 60 ditë nga dita e nënshkrimit të kontratës.

Ndërkohë shumë lagje në Tiranë vijojnë të përballen me mungesën e theksuar të ujit të pijshëm në këto ditë të nxehta gushti.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.