Ulen humbjet në rrjet në 3-mujorin e parë – OSHEE: Reduktohen në mënyre drastike ankesat

Operatori i Shpërndarjes së Energjisë Elektrike ka publikuar të dhënat e 3-Mujorit të parë të vitit 2019, të cilat kanë treguar se niveli i humbjeve në rrjetin e shpërndarjes ka zbritur në 26,2%. OSHEE tha se krahasuar me të njëjtën periudhë të një viti më parë, rezulton të jenë regjistruar 1,46% më pak humbje.

OSHEE tha se reduktimi i nivelit të humbjeve teknike dhe jo teknike, ka ardhur si rezultat i investimeve të kryera në rrjetin elektrik por edhe mirë koordinimit të punës në terren për kontrollet dhe ndërprerjen e lidhjeve të paligjshme.Gjithashtu, totali i Arkëtimeve ka pësuar një rritje të konsiderueshme në masën 4.6% krahasuar me një vit më parë ndërsa numri i abonentëve të rinj është shtuar me 2,3%. Në 3-mujorin e parë, të ardhurat nga arkëtimet janë 18.3 miliardë lekë me një përmirësim prej 816 milionë Lekë krahasuar me vitin e kaluar.

Sipas njoftimit, borxhi i keq principal për fatura 2007-2014 është 44,3 miliardë lekë në fund Mars 2019, nga 67,8 miliard që ishte në fund të vitit 2014. Kjo nënkupton reduktim në masën 1,1% nga fundi i vitit 2018 ose 34,7% nga fund viti 2014. OSHEE tha se ky tregues është përmirësuar në saj të ndjekjes së debitorëve nëpërmjet proceseve të vazhdueshme ashtu sikurse edhe riaktivizimit të aktmarrëveshjeve.

OSHEE tha se ka pasur edhe një rënie e numrit të ankesave për faturim në periudhën Janar-Mars 2019, në masën 19,8% krahasuar me një vit më parë çka dëshmon për rritjen e cilësisë në shërbim dhe faturim. Mesatarja e ankesave mujore në raport me numrin total të faturave të lëshuara është në nivelin e më pak se 0,6%.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.