Ulet taksa e infrastrukturës – Veliaj: Nxjerrim zyrat dhe call center-at nga ambientet për banim

Këshilli Bashkiak i Tiranës i ka hapur dritën jeshile vendimit për përgjysmimin e taksës për ndikimin në infrastrukturë për ndërtimet e reja, në masën 4 për qind të çmimit për shitje për m2, nga 8 për qind që është aktualisht. Ky vendim vlen vetëm për sipërfaqe ndërtimi deri në 30 mijë m2 për qëllime zyrash. Kryebashkiaku Erion Veliaj bëri me dije se këto zyra do të shtrihen përgjatë bulevardit të ri të Tiranës.

“Për të gjithë ju që mu ankuat, që keni pasur disa shqetësime, për të gjitha call-center-at që futen në çdo pallat, në çdo apartament, i kthyer dhe i transformuar në zyra, ku fare mirë mund të shkohet jashtë e të paguash aty ku duhet, sot i japin një incetivim këtij sektori. Duke kërkuar që brenda këtij viti ne të kemi një sipërfaqe të zgjeruar të zyrave në qendër të Tiranës”.

Këshilli miratoi edhe vendimin për miratimin e një linje të gjelbër urbane, ndërsa Veliaj paralajmëroi operatorët se do të fillojë procesi i transformimit të linjave aktuale me flotë elektrike.

“Vetëm një vit më parë dukej si fantazi, por para ca muajsh testuam autobusët elektrikë për të kuptuar të gjithë operatorët që kjo është e mundur. Sot makinat elektrike në qytet janë shtuar, po shtojmë edhe pikat e karikimit. Për sa kohë që kjo është e ardhmja dhe ky është vendimi që kemi marrë ne, sot ju propozojmë një linjë tërësisht elektrike, e cila do t’i jepet kujtdo operatori që na sjell të gjithë flotën elektrike. Sigurisht, ky është një inkurajim edhe për operatorët ekzistues, që të fillojnë të transformojnë linjat e tyre”, deklaroi Veliaj.

Në këshill u diskutuan dhe u miratuan edhe disa vendime të tjera rëndësishme, ndër të cilat ishte edhe strategjia për zhvillimin e komunitetit rom dhe egjiptian.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.