“Ulni taksën doganore për gomonet”/ Propozimi i Beqajt: Nga 15%, të bëhet 2%, stimul për turizmin detar
Deputeti Ilir Beqaj kërkon uljen e tarifës doganore për mjetet ujore për kënaqësi dhe sporte, të fryra me ajër ose gaz në 2%, nga 15% që është aktualisht. Qëllimi i projektligjit sipas Beqajt është krijimi i një lehtësie fiskale në fushën e turizmit detar, e cila favorizon dhe stimulon shtimin e një kategorie specifike të mjeteve lundruese turistike, të cilat për shkak të natyrë edhe kostos janë më të pëlqyeshme dhe më të aksesueshme për individët.
Sipas Relacionit shoqërues, aktualisht varkat me motor paguajnë një tarifë doganore prej 2%, ndërkohë që për mjetet e mësipërme tarifa shkon në 15%, çka i vendos në pozita të pabarabarta dhe të disfavorshme. Për këtë arsye synohet edhe një unifikim i tarifës doganore për mjetet lundrues në fushën e turizmit detar. Gjithashtu, sipas Beqajt ulja e tarifës doganore për këto mjete, që kanë edhe një kosto më të ulët, do të mundësoje një shtim të kërkesës për importin e tyre e për rrjedhojë shtim të përdorimit të tyre nga qytetarë apo biznese specific, duke krijuar një klimë më të favorshme drejt stimulimit dhe promovimit të turizmit.
Efekti negativ në të ardhura nga ky ndryshim, parashikohet në 2.4 mln lekë, por sipas Beqajt në rast të shtimit të importeve, do të influencojë në rritjen e të ardhurave nga TVSH, duke bërë balancimin e kësaj diference.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.