Urë e re pranë Pallatit me Shigjeta – Veliaj: Lehtësi për banorët e Njësisë 5 dhe 7. Duhet bashkëpunim për çdo projekt
Tiranës i është shtuar edhe një urë tjetër mbi lumin e Lanës për këmbësorët, një investim i kërkuar nga banorët e Njësisë 5 dhe Njësisë 7. Kreu i Bashkisë së Tiranës, Erion Veliaj u shpreh se kjo është ura e tretë që ndërtohet mbi lanë në tre vite dhe se do të ndihmojë jo vetëm për lëvizjen e njerëzve por edhe në zhvillimin e biznesit në këtë zonë.
“Ka banorë që punojnë nga njëra anë e Lanës te tjetra, ka banorë që shkojnë në shkollë, që bëjnë pazarin apo kryejnë vizitat e tyre, ura lidh dy hotele të rëndësishme, një hotel ndërkombëtar me një hotel shqiptar, pra ka edhe turizëm, edhe biznes që zhvillohet në këtë zonë.” – tha Veliaj
Duke theksuar se e ardhmja e Tiranës varet nga bashkëpunimi, kryebashkiaku Veliaj kërkoi prej banorëve të kryeqytetit mbështetje për projektet publike.
“Thirrja ime për të gjithë qytetarët është: Na duhet bashkëpunim, na duhet energji pozitive, inkurajim për çdo projekt publik. Ndaj, edhe jam i lumtur që edhe 100 metra më poshtë ku ka filluar projekti i Unazës, kemi një bashkëpunim total nga qytetarët, si nga tepelenasit, si nga tropojanët, si nga korçarët, si nga kuksianët. Fakti që të gjithë kemi kuptuar se pavarësisht se çfarë ka ndodhur në 20 apo 30 vitet e fundit, e ardhmja e Tiranës varet vetëm nga bashkëpunimi ynë, ky është një lajm shumë i mirë” – deklaroi Veliaj.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.