Ushqimet shqiptare ‘të painfektuara’ nga Covid! Zëri i vetëm i eksporteve që thyen rekordin e vitit të kaluar
Eksporti i ushqimeve, pijeve dhe duhanit nga Shqipëria, është i vetmi zë që pandemia nuk e ka prekur, ose më saktë nuk e prekur në sensin negativ, por vetëm sa e ka fuqizuar. Sipas Raportit më të fundit të Institutit të Statistikave, Shqipëria ka eksportuar 2.8 miliardë lekë më shumë ushqime, pije dhe duhan në periudhën janar – tetor 2020, nga ç’ka eksportuar në të njëjtën periudhë të vitit paraardhës.
Referuar të dhënave të INSTAT, në 10 mujorin e vitit 2019, Shqipëria ka eksportuar 29 miliardë lekë nga këto grupmallra, në destinacione të shpërndara nëpër shtete. Ndërkaq, në periudhën janar – tetor 2020, eksporti i ushqimeve, pijeve dhe duhan ka kapur vlerën 31.9 miliardë lekë.
Përpos këtyre grupmallrave, të gjithë zërat e tjerë në fakt kanë pësuar rënie të eksporteve, krahasuar me 10 mujorin e 2019-ës. Eksportet, në tërësinë e tyre janë ulur me 12.2%, nga periudha janar – tetor 2019. Instat tregon se grupet që kanë ndikuar më negativisht në uljen vjetore të eksporteve janë “tekstile dhe këpucë”, me 6.2%, “minerale, lëndë djegëse, energji elektrike” me 3.8%, si dhe “materiale ndërtimi dhe metale”, me 2.3%.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.