Ushqimi në Spitalin Ushtarak, shpallet tenderi 1.4 milionë euro – Kontrata do të jetë e vlefshme për 4 vite
Ministria e Punëve të Brendshme ka hapur procedurën e tenderimit për shërbimin e gatimit dhe shpërndarjes së ushqimit për Spitalin Universitar të Traumës.
Fondi limit pa TVSH për shërbimin e kateringut është caktuar 188.2 milionë lekë, ose rreth 1.4 milionë euro, ndërsa kohëzgjatja e kontratës me operatorin fitues do të jetë 4 vite.
Kontrata përcakton se operatori duhet të ofrojë përgatitjen e ushqimit, paketimin dhe ambalazhimin, transportin deri tek pavione sipas orareve të servirjes, shpërndarjes dhe servirjen deri tek pacienti dhe mjeku roje.
Sipas dokumenteve të tenderit, ushqimi do të shpërndahet në varësi të dietave të përcaktuara, si: dieta normale, e cila zë edhe pjesën kryesore të porosisë; dieta hidrike; dieta e lëngët; dieta për ulcerozën; dieta diabetike; dieta për mjekët; etj.
Dieta normale përfshin këto asortimente: 300 ml qumësht, 15 gr sheqer, 250 gr bukë, 150 gr oriz/makarona, 500 gr zarzavate, 30 ml vaj, 150 gr mish, 300 gr fruta, 80 gr djathë/gjizë, 10 gr gjalpë.
Ndërsa dieta për mjekët duhet të përfshijë rreth 4300 kalori në ditë dhe përbëhet nga: 600 gr bukë gruri, 60 gr oriz, 50 gr makarona, 60 gr fasule, 200 gr mish vici, 30 ml vaj për gatim, 10 ml vaj për sallatë, 30 gr gjalpë, 50 gr sheqer, 50 gr sallam/proshutë, 40 gr djathë i bardhë, 300 ml qumësht, 1 kokërr vezë, 500 gr perime, 250 gr fruta, 30 gr reçel, 3 gr salce, caj maji, kripë dhe erëza.
Kërkesat për operatorët ndërkohë përfshijnë punësimin e të paktën 20 punonjësve, si edhe realizimin e shërbimeve të ngjashme gjatë 3 viteve të fundit në të paktën 40% të vlerës së fondit limit.
Rëndësia e këtij shërbimi përshkruhet edhe në dokumentet e tenderit, ku sipas përshkrimit, përgatitja e ushqimit në cilësinë e duhur në bazë të dietave e kalorive do të ndikonte në uljen e ditëqëndrimit të pacienteve në spital, si dhe uljen e përdorimit te medikamenteve nga ana e tyre.
Tenderi do të qëndrojë i hapur deri më datë 29 Janar, datë pas së cilës do të shpallet edhe operatori fitues. Kushtet e tenderit përcaktojnë që shërbimi do të jetë 24 orë në ditë për 7 ditë të javës, ndërsa personeli i operatorit fitues duhet të kryejë edhe pastrimin e tavolinave dhe ushqimin e të sëmurëve rëndë që nuk kanë kujdestar, duke siguruar për këta të fundit edhe tavolina lëvizëse.
Ndërkohë, vlera e kontratës do të rishikohet në rritje vit pas viti, në varësi të indeksit të inflacionit.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.