Vaksina e CureVac dështon në prova / Një efektshmëri prej vetëm 47%, zhgënjen blerësit e mundshëm
Firma gjermane e bioteknologjisë, CureVac, bëri të ditur se vaksina e Covid ishte vetëm 47% efektive në provat e fazës së fundit, duke dështuar të arrijë objektivin kryesor. Efikasiteti zhgënjyes i vaksinës, që njihet si CVnCov, doli nga një analizë e brendshme bazuar tek 134 raste me Covid në një studim me rreth 40,000 vullnetarë në Europë dhe Amerikë Latine.
Blerësit e mundshëm për vaksinën e CureVac në Europë ishin rritur për shkak të vendosjes së limitit për moshën për vaksinën e AstraZeneca dhe Johnson&Johnson, prej shqetësimeve për mpiskjen e gjakut. Vaksina e CureVac pritej gjithashtu të ndihmonte vendet me të ardhura të ulëta e të mesme, që kanë mbetur mbrapa ekonomive të zhvilluara me imunizimin. Bashkimi Europian siguroi në Nëntorin e kaluar rreth 405 milionë doza të vaksinës së CureVac, prejt të cilave 180 milionë ishin opsionale. Aksionet në SHBA të CureVac ranë me 50% në 46.8 dollarë, pas publikimit të të dhënave.
Kompania bëri të ditur se të paktën 13 variante të virusit ishin të dukshme te infeksionet tek popullata në studim.
Kompania shtoi se rezultatet e brendshme tregojnë se vaksina është efektive tek pjesëmarrësit e rinj, por nuk kishte efikasitet tek ata në moshë 60-vjeç e sipër, që është grupi në rrezikun më të lartë.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.