Vaksina e Moderna ofron shpresë. Faza e parë, kryesisht e sigurtë. Nxit nivele të larta të antitrupave
Vaksina eksperimentale e Moderna për Covid-19 ka rezultuar e siguritë dhe ka nxitur përgjigje imunitare në të gjithë 45 vullnetarët e shëndetshëm, gjatë studimit të fazës fillestare, sipas hulumtuesve në SHBA. Vullnetarët që morën 2 dozat e vaksinës kishin nivele të larta të antitrupave vrasës të virusit që kalonin nivelet mesatare tek njerëzit që kishin kaluar Covid-19, sipas raportimeve të ekipit. Asnjë prej vullnetarëve nuk përjetoi efekte anësore, por më shumë se gjysma raportuan reagime të lehta si lodhje, dhimbje koke, ethe, dhimbje të muskujve dhe dhimbje në zonën e injektimit. Këto ka gjasa të ndodhin pas dozës së dytë dhe tek njerëzit që morën dozën më të madhe.
Ekspertët thonë se vaksina është e nevojshme për t’i dhënë fund pandemisë që ka prekur miliona njerëz dhe ka shkaktuar më shumë se 575,000 vdekje në të gjithë botën. Firma amerikane, Moderna, ishte e para që nisi testimet tek njerëzit të vaksinës së koronavirusit më 16 Mars, 66 ditë pasi u publikua sekuenca gjenetike e virusit. Anthony Fauci, drejtori i Institutit Kombëtar të Sëmundjeve Infektive, ekipi i të cilit zhvilloi vaksinën kandidat të Moderna, e quajti rezultatin një lajm pozitiv, duke theksuar se studimi nuk ka zbuluar ndonjë efekt serioz negativ dhe se vaksina ka prodhuar nivele të larta të antitrupave që vrasin virusin. Aksionet e Moderna u rritën me mbi 15% menjëherë pas lajmërimit.
Qeveria e Shteteve të Bashkuara po mbështet vaksinën e Moderna me thuajse gjysmë miliardë dollarë dhe e ka zgjedhur si një nga të parat për të hyrë në prova në masë tek njerëzit. Vaksina e suksesshme do të përbënte një fitore për Moderna, që nuk ka patur ndonjëherë një produkt të licensuar. Vaksina e Moderna, mRNA-1273, përdor acid ribonukleik (RNA), një lajmëtar kimik që përmban udhëzime për prodhimin e proteinave. Kur injektohet tek njerëzit, vaksina udhëzon qelizat që të prodhojnë proteina që imitojnë sipërfaqen e koronavirusit, të cilat trupi i njeh si një pushtues të jashtëm dhe krijon një kundërpërgjigje imunitare.
Rezultati i publikuar këtë javë përfshiu 3 doza të vaksinës, të testuar në grupe prej 15 vullnetarësh në moshë 18-55 vjeç, që morrën 2 injeksione. Grupet testuan doza në 25,100 dhe 250 mikrogramë të vaksinës. Efekte negative pas dozës së dytë ndodhën tek 13 vullnetarë që morën 25 mikrogramë, të gjithë 15 pjesëmarrësit me 100 mikrogramë dhe të gjithë 14 vullnetarët që morrën 250 mikrogram. Në grupin me dozën më të lartë, 3 pacientë kishin reagime të ashpra si temperaturë, ethe, dhimbje koke, apo të përziera. Një nga vullnetarët e grupit me dozën e lartë, kishte temperaturë në 39.5 gradë Celsius.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.