Vaksina/ Kategoritë që kanë prioritet, Manastirliu: “Vaksinimi do të nisë me mjekët dhe stafet e urgjencave”
Vaksinimi anticovid do të nisë me stafet e spitaleve Covid dhe të urgjencave. Këtë deklaratë bëri Ministrja e Shëndetësisë, Ogerta Manastiruliu gjatë një vizite në spitalin e Durrësit.
“Ajo çka pritet tani është fillimi i vaksinimit dhe ne e kemi thënë do të fillojmë me ata të cilët janë në vijën e parë të kësaj lufte, me mjekët, me infermierët në spitalet COVID, me punonjësit e urgjencave, të cilët janë në frontin e parë dhe po vijojnë këtë betejë me këtë armik të padukshëm”, tha Manastirliu.
Ministrja e Shëndetësisë foli edhe për situatën aktuale të shkaktuar si pasojë e Covid-19 duke thënë se spitalet rajonale janë në gatishmëri të plotë për përballimin e saj
“Në këtë situatë, spitalet rajonale po bëjnë përpjekje maksimale, qoftë për shërbimet e triazhit që kanë filluar që në momentin e parë por edhe ato sipas protokolleve dhe udhëzuesve të rasteve që kërkojnë një trajtim postcovid dhe që kërkojnë një mbështetje respiratore. Këto raste janë trajtuar dhe vijojnë të trajtohen në spitalet rajonale. Spitali i Durrësit ka një pavion të dedikuar për këto raste dhe jemi bërë gati që në rastet e një skenari ku do duhet që të dedikohen edhe për rastet covid, ne jemi gati me stafet e trajnuara, me aparaturat jetëshpëtuese, me të gjithë setin e elementëve që kanë nevojë, qoftë barna, materiale mjekësore. Po rrisim më shumë kapacitetet për të përballuar çdo skenar që kjo pandemi mund të na sjellë dhe pikërisht edhe flota e re e autoambulancave, një investimi i qeverisë shqiptare në përmbushje të përgjigjes sonë ndaj pandemisë, vjen për të lehtësuar menaxhimin dhe për të krijuar kapacitetet e nevojshme për të përballuar çdo skenar” , tha Manastirliu.
Deklaratat u bënë gjatë shpërndarjes së 36 autoambulancave të reja, që sipas ministres do të vijojë në të gjithë spitalet e vendit.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.