“Vaksina, një e mirë publike botërore”, OBSH: Duhet të aksesohet nga të gjithë që të mposhtet pandemia
Liderët politikë duhet të përpiqen që ta bëjnë vaksinën e Covid-19 të aksesueshme për të gjithë, një të mirë publike për të gjithë botën, sipas drejtorit të përgjithshëm të Organizatës Botërore të Shëndetësisë, Tedros Ghebreyesus. Ai tha në një konferencë për shtyp në selinë e Organizatës në Zvicër se angazhimet politika janë të rëndësishme për të gjithë, në mënyrë që të ketë akses të barabartë tek vaksina.
“Shpërndarja e drejtë dhe veçanërisht aksesi tek të varfërit dhe ata që nuk e përballojnë dot, do të jetë rezultat i angazhimeve politike nga liderët tanë”, tha ai. Ghebreyesus shtoi se disa vende nuk po angazhohen për këtë dhe nëse nuk ka konsensus që vaksina të kthehet në një të mirë publike botërore, do të përfundojë në duart e atyre që kanë më shumë para dhe do të mungojë tek ata që nuk e përballojnë dot. Drejtori i Organizatës Botërore të Shëndetësisë theksoi se kthimi i vaksinës në një produkt publik botërorë, nuk duhet të shihet si një lloj bamirësie.
Organizata ka formuluar dhe përfunduar një rrjet të shpërndarjes dhe ofrimi i vaksinës në publik do të jetë përfituese edhe për rimëkëmbjen e ekonomisë botërore. Ghebreyesus tha se avantazhi i përdorimit të aksesit të barabartë edhe për vendet e varfëra, është mposhtja e pandemisë në të gjithë botën, ç’ka do të sjellë një rimëkëmbje ekonomike më të shpejtë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.