Vaksinë falas për rotavirusin – Manastirliu: Privatisht kushtonte 100 USD, përfitojnë fëmijët e lindur pas 1 gushtit
Vaksina e rotavirusit, që deri më tani kushtonte rreth 100 dollarë për prindërit që e kryenin privatisht do të jetë pjesë e kalendarit kombëtar të vaksinimit, duke u ofruar falas për fëmijët e lindur nga data 1 gusht e këtij viti.
“Nga 1 Tetori i këtij viti është shtuar në kalendarin e vaksinimit vaksina e re e Rotavirusit, duke përafruar kalendarin tonë të vaksinimit me kalendarin europian. Është shumë e rëndësishme sepse përmirëson shëndetin e fëmijëve tanë nga virusi I rrezikshëm i rotavirusit dhe infeksionet që vijnë prej tij. Do të përfitojnë rreth 30 fëmijë në vit”, u shpreh Ogerta Manastirliu.
Sipas Manastirliut, me futjen e kësaj vaksine buxhetit të familjeve shqiptare i kursehet rreth 3 milion dollarë në vit. Ndërkohë që, efekti financiar në buxhetin e shtetit përllogaritet në 600 mijë dollarë. Vaksina e rotavirusit jepet nga goja me 3 doza në moshat 2, 4 dhe 6 muaj. Vaksina është shpërndarë në çdo qendër shëndetësore sipas planeve të tyre të vaksinimit dhe është ritrajnuar i gjithë stafi mjekësor.
Një sistem i cili monitoron sigurinë e vaksinës është vendosur në vend dhe do të vëzhgohet gjatë të gjithë kohës. Sëmundja e Rotavirusit është e zakonshme tek foshnjat dhe fëmijët e vegjël. Rotavirusi mund të shkaktojë diarre të rëndë, të vjella, ethe dhe dhimbje barku. Disa fëmijë me sëmundje rotavirusi humbasin shumë lëngje dhe bëhen shumë të dehidratuar. Me futjen e vaksinës së re, kalendari i vaksinimit ka 12 vaksina të detyrueshme për fëmijët.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.