“Vaksinë me mik”! Guvernatori 71 vjeçar italian vaksinohet publikisht por shkakton polemika se ka hyrë pa radhë. “Edhe presidenti 79 vjeçar po pret”   

“Unë u vaksinova dhe këtë duhet ta bëjnë të gjithë”. Ka qenë  kjo deklarata e guvernatorit 71 vjeçar të Campania-s në Itali Vincenzo De Luca që në rrjetet sociale u ofrua si promovues i fushatës për vaksinimin.

Por nga kundështarët e tij politikë kanë nisur një serë akuzash lidhur me përparësinë që i është dhënë atij në vaksinim. Duke qenë se dozat janë të pakta në numër, rendi i vaksinimit parashikon fillimisht punonjësit shëndetësorë dhe më pas të moshuarit që janë në qendrat e kujdesit shëndetësor.

Është mbyllur kështu mes polemikash dita e parë e vaksinimit në Campania, ku në ditën e parë janë shpërndarë 720 dozat e para të vaksinës në 7 spitale dhe në një azil të moshuarish. Gjithçka ka shkuar mirë në aspektin organizativ, klimë e mirë besimi mes mjekëve dhe infermierëve. Guvernatori i Campania-s është shfaqur publikisht shumë kritik lidhur me mënyrën sesi po shpërndahen vaksinat për rajonet në Itali duke kërkuar që sasia e vaksinave që i jepet çdo rajoni të bazohet mbi numrin e popullsisë rezidente dhe mbi të gjitha ai ka ngritur shqetësimin se kjo mënyrë shpërndarje mund të krijojë një treg të zi për sigurimin e vaksinës.

Pasi ështëshfaqur publikisht duke njoftuar se ka bërë vaksinën, guvernatori 71 vjeçar ka shkaktuar një serë polemikash. Reagimi i parë erdhi nga eurodeputeti Fulvio Martusciello i cili tha se guvernatori ka kapërcyer radhën në mënyrë të paturpshme. Sipas ANSA-s, edhe kryebashkiaku i Napolit Luigi de Magistris e ka cilësuar si një “abuzim me pushtetin”. “T’i vijë turp dhe të kërkojë falje” është shprehur De Magistris.

Po ashtu, edhe liderët e qendrës së djathtë kanë shfaqur kritika publike. “De Luca ia ka marrë vaksinën dikujt që ka më shumë nevojë”. Valeria Ciarambino, kryetare e grupit të deputetëve të Lëvizjes 5 yje kujton faktin se “presidenti 79 vjeçar i Italisë Sergio Matarella po pret radhën për të bërë vaksinën”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.