Vaksinimet ‘përhapen’ në Shqipëri! Pas Tiranës e Shkodrës, nis në Vlorë,Fier, Gjirokastër, Elbasan e Korçë
Vlora është qyteti i radhës ku nis procesi i vaksinimit kundër virusit COVID-19 me mjekët dhe infermierët që po vaksinohet të parët. Bashkë me ministren e Shëndetësisë Ogerta Manastirliu, Kryeministri Rama pa nga afër procesin e vaksinimit në qendrën e vaksinimit në Pallatin e Sportit të Vlorës, qyteti i tretë që nis procesin pas Tiranës e Shkodrës.
“Kemi planifikuar që çdo ditë të vaksinojmë rreth 150-200 mjekë dhe infermierë, duke filluar nga spitali i Vlorës më pas edhe spitalet bashkiake. Po vlerësojmë që edhe në Gjirokastër të kemi një pikë vaksinimi. Në dy ditët e para të vaksinimit të kësaj jave janë vaksinuar më shumë se 600 mjekë dhe infermierë”, – shprehet ministrja Manastirliu.
Duke mbikëqyrur procesin në këtë qendër të tretë ishte edhe Silva Bino, shefe e Departamentit të Epidemiologjisë dhe Kontrollit të Sëmundjeve Infektive, e cila ka zgjedhura të vaksinohet edhe vetë në këtë qendër. “Sot jemi në Vlorë, nesër në Fier, ndërkohë dhe Gjirokastra do fillojë me shtëpitë e të moshuarve. Elbasani dhe Korça gjithashtu. Edhe pranueshmëria është e mirë, asnjë dozë nuk kemi humbur”, – shprehet Bino.
Në fjalën e saj, Bino evidentoi se mes mjekëve nuk ka skepticizëm për marrjen e vaksinës por duhet parë për pjesën tjetër të popullatës kur të nisë procesi.
Dita e sotme pritet të mbyllet me vaksinimin e rreth 200 mjekëve dhe infermierëve.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.