Vaksinimi i 5-11 vjeçarëve në SHBA – Paneli i FDA rekomandon Pfizer, që ka efektshmëri në 90.7% tek ata

Një panel i ekspertëve votoi me shumicë për të rekomanduar që Administrata e Barnave në SHBA të autorizojë vaksinën e Covid-19 të Pfizer me BioNTech për fëmijët në moshë 5-11 vjeç, duke thënë se përfitimet tejkalojnë rreziqet.  Autorizimi i grupmoshës do të ishte një hap i rëndësishëm rregullator drejt arritjes së objektivit prej 28 milionë fëmijë të imunizuar.Vaksina mund të disponohet tek grupmosha që prej javës së ardhshme. Agjencia nuk është e detyruar të ndjekë këshillën e ekspertëve të jashtëm, por zakonisht e bën.

Votimi rezultoi në 17 pro dhe 1 abstenim.  Nëse agjencia e autorizon vaksinën për këtë moshë, një panel këshillues i Qendrës për Kontrollin dhe Parandalimin e Sëmundjeve do të takohet javën e ardhshme, për të bërë rekomandimin mbi administrimin e vaksinës. Shefja e CDC merr vendimin përfundimtar.  Ndërkohë që sëmundja e ashpër e Covid apo vdekjet janë relativisht të rralla tek fëmijët, në krahasim me të rriturit, disa po zhvillojnë ndërlikime nga sëmundja dhe infeksionet tek fëmijët e pavaksinuar janë rritur prej variantit Delta. Të dhënat nga Akademia e Pediatërve në SHBA tregojnë se mbi 500 fëmijë në SHBA kanë vdekur nga Covid.

Pak vende të tjera, përfshirë Kinën, Kubën dhe Emiratet e Bashkuara Arabe, kanë autorizuar deri më tani vaksinimin e fëmijëve në këtë grupmoshë, apo më të vegjël. Në SHBA, vetëm 57% e popullsisë është vaksinuar plotësisht, ç’ka e lë pas vendeve të tjera si Britania dhe Franca. Organizata Botërore e Shëndetësisë ka bërë thirrje që prej Majit që vendet e pasura të rikonsiderojnë vaksinimin e fëmijëve, dhe këto doza t’i dhurojnë tek programi COVAX për vendet e varfra. Pfizer po kërkon miratim për një dozë më të ulët prej 10 mikrogram për fëmijët e vegjël, nga 30 mikrogram që përdoret për ata në 12-vjeç e sipër. Kompanitë deklaruan se vaksina është 90.7% efektive te provat e fëmijëve në moshë 5-11 vjeç.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.