Vala e të nxehtit në Europë: Italia në krizë prej thatësirës, zjarre të shumta në Spanjë e Gjermani!

Mijëra hektarë tokë të shkrumbuara. Zona e Siera de Kulebra në Spanjë po digjet prej së mërkurës. Në 10 vitet e fundit nuk ishte regjistruar asnjëherë një zjarr kaq i përhapur në pyje dhe zjarrfikësit janë ende në përpjekje për ta shuar.

Ndërkohë mediat spanjolle raportojnë se janë 8 zonat e evakuara në rajonin e Navara-s, që është dhe më i prekuri orët e fundit si pasojë e zjarreve në pyje. Qindra zjarrfikës po përpiqen të kontrollojnë flakët që kërcënojnë zonat e banuara.

Por në pjesën tjetër të vendit, ata që munden shkojnë në plazhe, por duke e pranuar se temperatura kaq të larta në këtë sezon nuk janë normale.

Alarmi për thatësirën në Itali pritet të transformohet në një gjendje të jashtëzakonshme. Sektori i agrokulturës është në një situatë të keqe për shkak të mungesës së reshjeve. Në Piemonte është dhënë një afat kohor vetëm prej 15 ditësh për të shpëtuar të korrat. Niveli hidrometrik i PO-së në urën Beka ka zbritur në minus 3.7, niveli më i ulët prej të paktën 70 vitesh. Në disa prej shtëpive banorët mbyllin rubinetat që të mbushin cisternat për ditën

Në Francë një gjuajtje nga ana e artilierisë gjatë një stërvitjeje shkaktoi një zjarr të madh i cili shkatërroi 600 hektarë bimësi. Zjarrfikësit e patën të vështirë të marrin situatën nën kontroll pasi zona ishte e minuar.

Dhe në Zvicër e Gjermani janë shënuar temperatura rekord. Në bregun e lumit Limat në qendër të Zyrihut, është e vështirë të gjendet një vend i lirë, ndërsa në Gjermani temperatura ka arritur deri në 38.7 gradë.

Një zjarr në një pyll pranë Berlinit shkatërro 200 hektarë tokë dhe 500 persona u impenjuan të shuanin flakët të cilat favorizoheshin nga erërat e forta. Autoritetet evakuuan dy qyteza.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.