Varësia ndaj remitancave, BB: Shqipëria, ndër vendet me varësinë më të ulët në rajon
Banka Botërore së fundmi ka publikuar një dokument që analizon impaktin e emigracionit në ekonominë globale. Në fokus të këtij dokumenti është pikërisht roli i remitancave në vendet në zhvillim. Si një vend me emigracion mjaft të lartë, Shqipëria nuk ka si të mos jetë pjesë e kësaj analize.
Vendi ynë figuron ndër 10 vendet e europës lindore dhe qendrore ku remitancat kanë peshën më të madhe në raport me Prodhimin e Brendshëm Bruto. Kjo normë për vendin tonë, sipas Bankës Botërore fiksohet në rreth 8.8%, pavarësisht se, shifra bazohet mbi vlerësime paraprake. Ndër këto dhjetë vende, Shqipëria renditet e parafundit, duke qëndruar përpara Serbisë.
Duke qenë se varësia, nuk mund të konsiderohet në asnjë rast si diçka pozitive, sidomos sa i përket remitancave, që janë të luhatshme dhe të ndikuara nga faktorët e jashtëm, vendi i parafundit në këtë listë shihet me optimizëm. Për Kosovën norma fiksohet në 14.8%, dhe renditet në vendin e katërt, në Bosnje norma fiksohet në 12.5%, në Mal të Zi në 9.2% dhe në Serbi në 8.5%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.