Vatrat e “nxehta” të COVID-19 – Më shumë raste në 1 javë, por shërimet ulin numrin e rasteve aktive
1010 raste të reja me COVID-19 u shënuan gjatë javës që lamë pas, sipas raportimit ditor të Ministrisë së Shëndetësisë, duke shënuar një rritje në raport me një javë më parë, ku u regjistruan 874 raste. Sipas të dhënave të përpunuara nga TV SCAN Tirana mbetet qyteti me numrin më të lartë të infektuarve të rinj gjatë periudhës 28 shtator- 4 tetor 466 raste apo 88 raste më shumë se java paraardhëse. Korça dhe Durrësi janë 2 qytetet e tjerë që kanë regjistruar më shumë të infektuar të rinj gjatë javës që lamë pas me 58 dhe 52 raste. Ndërkohë që, pas tyre vijnë Fieri me 47 raste, Elbasani me 43 raste dhe Berati me 36 raste të reja.
Shkodra regjistroi 33 raste të reja, Vlora 20 raste dhe Gjirokastra 19 raste të reja, duke u pozicionuar në 9 qytetet me numrin më të lartë të të infektuarve të rinj. Këto qytete zënë rreth 77% të të gjithë rasteve të regjistruar javën që shkoi, ndërkohë që pjesa tjetër prej 23%, ndahet mes 38 qyteteve të tjerë të vendit. Sipas raportimeve zyrtare raste të rinj me COVID-19 u regjistruan në total në 47 qytete, çka do të thotë se në 14 bashki të tjera, të paktën prej 1 jave nuk raportohen raste të infektuarish të rinj.
Ajo që bie në sy javën e fundit është një shtrirje e CVOID-19 në më shumë qytete, në raport me javët paraardhëse, ndërkohë që në shumë prej qyteteve ku strukturat shëndetësore raportojnë raste të reja numërojnë vetëm nga 1 rast gjatë gjithë javës që lamë pas. Në total, deri të dielën në të gjithë vendin numërohen 5195 qytetarët e infektuar aktivë, një shifër që ka pësuar rënie në raport me një javë më parë ku numëroheshin 5348 qytetarë të infektuar me COVID-19. Shkak për këtë raport është bërë numri i lartë i personave të shëruar në javën që lamë pas.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.