Vazhdojnë grevat në Gjermani – Ndalon prodhimi i makinave, sindikatat kërkojnë rritjen e pagave me 8%
Fabrikat e makinave në Gjermani kanë ndaluar aktivitetin këtë javë, ndërkohë që punëtorët në sektorin industrial kanë vazhduar grevat 24-orëshe, duke u përqëndruar në fabrika të zotëruara nga Mercedes-Benz, Porsche, Audi dhe BMW. Sipas sindikatës IG Metall, edhe furnitorët e prodhuesve të makinave si Schaeffler dhe SKF janë goditur nga aksioni industrial, që ka për synim rritjen e pagave dhe fleksibilitetin në orët e punës për 3.9 milionë punëtorë gjermanë.
Grevat 24-orëshe përbëjnë paralajmërimin e fundit nga sindikata përpara se të nisë votimi nëse aksioni do të zgjasë, gjë që mund t’i kushtojë kompanive gjermane qindra milionë euro në humbje të prodhimit. Sindikatat dhe punëdhënësit kanë thënë se do të rinisin bisedimet ditën e Hënë, por nuk kanë rënë ende dakord se kush do të jetë pala që do të tërhiqet. Ndërkohë që ekonomia më e madhe e Europës ndodhet në performancë të fortë dhe papunësia në nivel rekord të ulët, sindikata më e madhe e vendit po kërkon një rritje të pagave me 8% brenda 27 muajve në sektorin industrial.
Sindikata ka kërkuar që punëtorët të kenë mundësi që të reduktojnë orët javore në 28 nga 35, për t’u kujdesur për fëmijët, të moshuarit apo të afërmit e sëmurë, si dhe të kenë mundësi që të rikthehen në kohë të plotë pas 2 vitesh. Punëdhënësit ofruan një rritje të pagave me 6.8%, por refuzuan kërkesën e orëve më të pakta në punë. Thuajse 200,000 punëtorë në më shumë se 100 kompani, përfshirë prodhuesin e kamionëve MAN dhe Ford, kanë organizuar greva 24-orëshe ditën e Mërkurë dhe të Enjten. Shifra pritet të rritet në 260 kompani, ku përfshihen edhe firma nga industri të tjera si Airbus dhe Siemens.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.