Vazhdon e njëjta “histori” – Në rënie sigurimi i pronës nga fatkeqësitë natyrore
Me stinën e Vjeshtës që sapo ka hyrë, shirat janë kërcënimi numër një, sidomos në bujqësi. Gjatë viteve të shkuara, përmbytjet kanë qenë problemi numër një për sektorin, e sidomos dëmshpërblimet që kanë rezultuar një sagë e tejzgjatur.
Autoritetet dhe aktorët e tjerë të tregut, kanë bërë vazhdimisht apel për sigurimin e pronës apo tokës së tyre nga fatkeqësitë natyrore, një praktikë pak e përhapur kjo në vendin tonë, pavarësisht se moti shpeshherë nuk është treguar zemërgjerë, dhe jo vetëm në stinë si Vjeshta, por edhe në dimër me ngricat, apo verë me zjarret.
Por duket, se një apel i tillë ka shkuar në vesh të shurdhët. Të dhënat më të fundit për tregun e sigurimeve nga Autoriteti i Mbikëqyrjes Financiare, flasin për një rënie të numrit të primeve në zërin sigurimi nga zjarri dhe forcat e natyrës me 3.83% në krahasim me të njëjtën periudhë të vitit 2016.
Numri i kontratave në këtë portofol ndërkohë ka rënë me 6.19%. Tendenca në rënie e kësaj kategorie është përgjithësisht kundër tendencës së përgjithshme të tregut, çka nënvizon për të disatën herë se në këtë drejtim duhen bërë përpjekje më të mëdha nga autoritetet përgjegjegjëse, për të ndërgjegjësuar, incentivuar apo pse jo, edhe detyruar fermerët, por edhe banorët në zonat e rrezikuara, që të sigurojnë pronën e tyre nga fatkeqësitë natyrore.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.