Vazhdon zhvlerësimi i frangës – Rënia më e madhe në 6 vite, lehtëson bankën kombëtare

Franga zvicerane është drejt rënies më të madhe mujore në 6 vite, ndërkohë që ditën e  Premte shënoi rënie për të 4-tën ditë radhazi.

Analistët thonë se mbivlerësimi i valutës, që cilësohet si aktive e sigurt, mund të ketë arritur drejt një fundi.

Rënia e mprehtë e frangës i kapi në befasi investitorët, duke marrë parasysh reputacionin e valutës për qëndrueshmëri, dukë sjellë dyshime mbi rolin e Bankës Qendrore te valuta.

Kreu i Bankës Komëbare të Zvicrës (SNB), Thomas Jordan, tha në fillim të javës se franga mbetet ende e mbivlerësuar.

Franga ra ndjeshëm kundër euros në sesionin e ditës së Premte, duke u tregtuar në 1.13 (EUR/CHF), në rënie me 3% për javën.  Kundër dollarit, valuta arriti nivelin më të ulët në 1 muaj, në 0.9723 (USD/CHF).

Valuta zvicerane është e lidhur ngushtë me euron dhe varet gjithashtu nga politikat e BQE. Në muajin Janar 2015, kohë kur BQE nisi programin e stimujve monetarë, tavani me valutën europane në 1.20 franga, u braktis nga Banka Kombëtare e Zvicrës.

Morgan Stanley raportoi ditën e Premte se franga qëndron ende valuta më e fortë në vendet e G10-s, pavarësisht rënies në javën e fundit.

Zhvillimet e fundit mund të reduktojnë presionet e Bankës Qendrore të Zvicrës, që ka ndërhyrë për të limituar vlerësimin e valutës prej kohësh.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.